368.59
Թուրքիայի կրթության նախարարությանը մեղադրում են «Արարատը հայերին տալու մեջ»
1 րոպեի ընթերցում
ԵՐԵՎԱՆ, 5 ՀՈԿՏԵՄԲԵՐԻ, ԱՐՄԵՆՊՐԵՍ: Թուրքիայի կրթության նախարարության կողմից այդ երկրի տարրական եւ միջնակարգ դպրոցների համար ֆիզիկական քարտեզի տպագրությունը, որում Արարատը պատկերված է Հայաստանի սահմաններում, առաջին հայամետ քայլը չէ, որի պատճառով նախարարը ենթարկվում է քննադատության: Ինչպես «Արմենպրես»-ի հետ զրույցում նշեց թուրքագետ Գեւորգ Պետրոսյանը, կրթության նախարարի նախաձեռնությամբ Թուրքիայի կառավարությունը որոշում է կայացրել թույլատրել ՀՀ քաղաքացիների երեխաների ուսումնառությունը միջնակարգ դպրոցներում, ինչպես նաեւ' հայերեն դասագրքերի տպագրությունը:
«Թուրք ազգայնականների համար կրթության նախարարության այս քայլը դավաճանության հերթական օրինակն է, որով նրանք, իբր, փորձում են սիրաշահել հայերին»,- ընդգծեց թուրքագետը:
Նշենք նաեւ, որ նշված քարտեզների տպագրության գործով թուրքական հասարակական կազմակերպություններից մեկն արդեն դատի է տվել Թուրքիայի կրթության նախարարությանը:
Բաժանորդագրվեք մեր ալիքին Telegram-ում