Է.Շարմազանով. «Միջազգային հանրությունն աջակցում է Հայաստանում ընթացող ժողովրդավարական գործընթացներին»
4 րոպեի ընթերցում
![Է.Շարմազանով. «Միջազգային հանրությունն աջակցում է Հայաստանում ընթացող ժողովրդավարական գործընթացներին»](http://armenpress.am/resized/480/static/news/b/2011/10/665012.jpg)
ԵՐԵՎԱՆ, 4 ՀՈԿՏԵՄԲԵՐԻ, ԱՐՄԵՆՊՐԵՍ: Միջազգային հանրությունն աջակցում եւ բարձր է գնահատում Հայաստանում ընթացող ժողովրդավարական գործընթացները, եւ պատահական չէ, որ դրա մասին նույնիսկ խոսում է արտախորհրդարանական ընդդիմության առաջնորդը: Այսօր Ազգային ժողովում նման հայտարարությամբ հանդես եկավ ՀՀԿ խմբակցության քարտուղար Էդուարդ Շարմազանովը' անդրադառնալով ՀՀ նախագահի' ԱՄՆ, Ֆրանսիա եւ Լեհաստան կատարած այցերին:
Անդրադառնալով ՀՀ նախագահի' ՄԱԿ-ում ունեցած ելույթին' Է.Շարմազանովը նշեց, որ այդ ելույթը հստակ ազդակներ ուղղեց միջազգային հանրությանը, այդ թվում' առ այն, որ Հայաստանում ժողովրդավարական ազատություններն այլընտրանք չունեն:
«Աշխարհում շարունակվում է ինքնորոշման իրավունքի հաղթարշավը: Զուգահեռներ անցկանցելը Հարավային Սուդանի հետ ցույց է տալիս, որ անխուսափելի է Արցախի Հանրապետության միջազգային ճանաչումը»,- որպես երկրորդ ազդակ նշեց ՀՀԿ խմբակցության պատգամավորը' հավելելով, որ Ադրբեջանը շարունակում է ռասիզմի եւ պատերազմի քարոզչությունը: Հաջորդ ազդակը, ըստ Է.Շարմազանովի, այն է, որ հայ-թուրքական գործընթացի վիժեցման մեղավորը եւ պատասխանատուն թուրքական կողմն է:
«Ելույթը եւս մեկ անգամ ցույց տվեց, որ մեր դիրքորոշումները համահունչ են միջազգային հանրության դիրքորոշման հետ»,- շեշտեց ՀՀԿ խմբակցության քարտուղարը:
Նախագահի Ֆրանսիա կատարած այցից Է.Շարմազանովը կարեւորեց փոխադարձ հետաքրքրություն ներկայացնող հարցերի լայն շրջանակի քննարկումը եւ Ֆրանսիայի նախագահի կողմից Հայաստանում իրականացվող բարեփոխումների նկատմամբ տրված դրական գնահատականը:
Արեւելյան գործընկերության գագաթնաժողովում Սերժ Սարգսյանի ելույթից Է.Շարմազանովը մասնավորապես առանձնացրեց այն, որ Հայաստանն աջակցում է Եվրոպական հարեւանության քաղաքականության «ավելի շատ աջակցություն' ավելի շատ բարեփոխումների դիմաց» սկզբունքին եւ կարեւորեց տարբերակված մոտեցումը:
Նախագահի ելույթից Է.Շարմազանովը կարեւորեց նաեւ այն հատվածները, որոնք նվիրված էին Լեռնային Ղարաբաղի հակամարտությանը: «Հստակորեն նշվեց, որ Հայաստանը հավատարիմ է ԵԱՀԿ Մինսկի խմբի եռանախագահների միջնորդությամբ ընթացող գործընթացին: Իսկ խնդրի լուծման բանալին ժողովրդի կողմից սեփական ճակատագրի ինքնուրույն տնօրինման մեջ է: Արցախի բնակիչները նույնքան եվրոպացի են, որքան մեզանից յուրաքանչյուրը: Այսինքն' Արցախը ոչ միայն տարածք է, այլ առաջին հերթին մարդիկ, որոնք կառուցում են պետություն' խարսխված ժողովրդավարության սկզբունքների վրա»,- ասաց պատգամավորը:
Նա նաեւ ընդգծեց, որ Վարշավայի ամփոփիչ հռչակագիրը համահունչ է հայկական կողմի դիրքորոշումների հետ, որտեղ նշվում էր, որ հակամարտությունները պետք է լուծվեն խաղաղ պայմաններում' միջազգային իրավունքի հիման վրա:
«Այսպիսով, հարկ եմ համարում նշել, որ Հայաստանի իշխանությունները վճռական են շարունակելու բարեփոխումների կուրսը եւ իրականացնելու քաղաքականություն, որը բխում է մեր երկրի ազգային եւ պետական շահերից»,- շեշտեց Է.Շարմազանովը: