Ա. Բաղդասարյան. «Կազմակերպված հանցավորությունն աճի միտում ունի ինչպես ամբողջ աշխարհում, այնպես էլ` Հայաստանում»
2 րոպեի ընթերցում
![Ա. Բաղդասարյան. «Կազմակերպված հանցավորությունն աճի միտում ունի ինչպես ամբողջ աշխարհում, այնպես էլ` Հայաստանում»](http://armenpress.am/resized/480/static/news/b/2011/10/664958.jpg)
ԵՐԵՎԱՆ, 4 ՀՈԿՏԵՄԲԵՐԻ, ԱՐՄԵՆՊՐԵՍ:Կազմակերպված հանցավորության դեմ պայքարի արդյունավետության բարձրացման ծրագրի մշակման միջգերատեսչական հանձնախմբի նիստում այսօր քննարկվեց ու հավանության արժանացավ «Հանցավորության դեմ պայքարի արդյունավետության բարձրացման ծրագիրը»:
Ինչպես նշեց ՀՀ Ազգային անվտանգության խորհրդի քարտուղար Արթուր Բաղդասարյանը, կազմակերպված հանցավորության դեմ պայքարը Հայաստանի համար ոչ միայն հանրային գերակայություն է, այլ նաեւ ամրագրված է Ազգային անվտանգության ռազմավարության մեջ:
Ա. Բաղդասարյանի խոսքով' հանցավորության դեմ պայքարը ներառված է ՀՀ միջազգային պարտավորությունների, մասնավորապես երեք' Հայաստան-Եվրոպական միություն, Հայաստան-ՆԱՏՕ եւ Հայաստան-Հավաքական անվտանգության պայմանագրի կազմակերպության միջազգային մանդատների շրջանակներում, մեր երկիրը ստանձնել է մշակելու Կազմակերպված հանցավորության դեմ պայքարի ազգային ռազմավարությունը, ինչը կարեւոր դեր կունենա արդյունավետ պայքարի համար:
Խորհրդի քարտուղարը, անդրադառնալով վերջին շրջանում ՀՀ-ում նկատվող կազմավորված հանցավոր խմբերի գործունեության աճին, մասնավորապես, Երեւան քաղաքում լայնածավալ գործողություններ իրականացրած հանցավոր խմբի ավազակային գործունեությանը, կարեւորեց ՀՀ ոստիկանության ջանքերը' ուղղված խմբավորման վնասազերծմանը: «Կազմակերպված հանցավորությունն աճի միտում ունի ինչպես ամբողջ աշխարհում, այնպես էլ Հայաստանում: Պետք է կարողանանք արդյունավետ պայքարի ճիշտ գործիքներ կիրառել»,- նշեց Ա. Բաղդասարյանը' հավելելով, որ այս փաստաթղթի ընդունումը կարեւոր նշանակություն ունի, որին պետք է հաջորդեն անհրաժեշտ օրենսդրական փոփոխություններ, ենթաօրենսդրական ակտեր ու ֆինանսական միջոցների հատկացումը' այս չարիքի դեմ պայքարը մեր երկրի կողմից համակարգված դարձնելու համար: Սահմանված կարգով Անվտանգության խորհրդի հավանությանն արժանանացած «Հանցավորության դեմ պայքարի արդյունավետության բարձրացման ծրագիրը» համապատասխան օրենսդրական ակտով կներկայացվի ՀՀ նախագահին: