2 րոպեի ընթերցում
ԵՐԵՎԱՆ, 23 ՍԵՊՏԵՄԲԵՐԻ, ԱՐՄԵՆՊՐԵՍ: Հայաստանի Հանրապետության անկախության 20-ամյակին նվիրված զորահանդեսը ցույց տվեց, որ ադրբեջանական կողմը Հայաստանի նկատմամբ ռազմական գերակայություն չունի: Այս մասին այսօր լրագրողների հետ հանդիպման ժամանակ ասաց ռազմական փորձագետ Դավիթ Ջամալյանը' հավելելով, որ շքերթից հետո ադրբեջանական կողմը փորձեց վարկաբեկել զորահանդեսը, սակայն հնչեցին մակերեսային, անհիմն վիրավորանքներ եւ հայտարարություններ: «Սա ցույց է տալիս, որ տիպիկ թուրքական մտածողության հետ գործ ունենք»,-ասաց Դ. Ջամալյանը:
Նա նշեց այն երեք հիմնական զինատեսակները, որոնց առկայությունը հայկական ԶՈՒ-ում Ադրբեջանը չի ցանկանում ընդունել: Դա «Էլբրուս» հրթիռային տեխնիկան է, «Տոչկա» հրթիռային զինատեսակը եւ C-300 հակաօդային պաշտպանության համակարգը: Ռազմական փորձագետի խոսքով' զորահանդեսի անցկացմամբ Հայաստանի սպառազինությունների ձեռքբերումը չի ավարտվում:
Դ. Ջամալյանն անդրադարձավ նաեւ «Սմերչ» զինատեսակին'ասելով, որ այն զորահանդեսին ներկայացված չէր: Փորձագետը համոզմունք հայտնեց, որ Հայաստան բերելուն պես այս զինատեսակը եւս կցուցադրվի հանրությանը:
Խոսելով բոլոր այս զինատեսակների' մոտ եւ հեռավոր ապագայում կիրառելու հավանականությունից' Դ. Ջամալյանը նշեց, որ հայկական կողմը նախահարձակ չի լինելու, սակայն եթե հայտնվի մի իրավիճակում, որտեղ հակառակորդը ագրեսիա կիրառի, ապա հակահարված տալուն ոչինչ չի խանգարի: