Ա. Սիմավորյան. «Ներկայում Իսրայելը պատրաստ չէ ընդունելու Հայոց ցեղասպանությունը»
2 րոպեի ընթերցում
ԵՐԵՎԱՆ, 20 ՍԵՊՏԵՄԲԵՐԻ, ԱՐՄԵՆՊՐԵՍ: Հոկտեմբերին Իսրայելի խորհրդարանում (Քնեսեթ) քննարկվելու է Հայոց ցեղասպանության ճանաչման հարցը: Ինչպես այսօր լրագրողների հետ հանդիպման ժամանակ ասաց «Նորավանք» գիտակրթական հիմնադրամի Հայագիտական կենտրոնի ղեկավար, թուրքագետ Արեստակես Սիմավորյանը, ներկայում Իսրայելը պատրաստ չէ ընդունելու ցեղասպանությունը,քանի որ վերջնականապես կմեկուսանա տարածաշրջանից:»Մենք ավելի շուտ ականատես կլինենք, որ Իսրայելը երրորդ երկրների միջոցով կփորձի օգտագործել Հայոց ցեղասպանության հարցը: Եւ այդ երրորդ երկիրը կա'մ կօգնի, կա'մ կխոչընդոտի այդ գործընթացին»,-նշեց Ա.Սիմավորյանը' հավելելով, որ Իսրայելի կողմից Ցեղասպանության փաստի ընդունումը կախված է նաեւ Թուրքիայից եւ նրա վարած քաղաքականությունից: Որքան սրվեն Թուրքիայի հետ հարաբերությունները, այնքան հնարավոր են նոր բեկումներ այս գործընթացում:
Թուրքագետի խոսքով' հրեաները հայերին համագործակցության ազդակներ են տալիս:»Կան ռիսկային գործոններ. եթե մենք գնանք համագործակցության հրեական կազմակերպությունների հետ եւ ընդհանուր մոտեցումներ ունենանք ցեղասպանության հարցի վերաբերյալ, չի բացառվում, որ մոտակա ժամանակներում թուրք-իսրայելական վատթարացած հարաբերությունները կգնան դեպի կարգավորում: Ուստի չպետք է հրեաներին շատ մոտ թողնել»,- ասաց նա:
Ա. Սիմավորյանը համոզմունք հայտնեց, որ ցեղասպանությունը գործիք է մեկը մյուսին ճնշելու համար: