Հայաստանում կրթություն ստանալը մատչելի է

ԵՐԵւԱՆ, 9 ՍԵՊՏԵՄԲԵՐԻ, ԱՐՄԵՆՊՐԵՍ: Արտերկրում ապրող մեր հայրենակիցները նախընտրում են ուսում ստանալ Հայաստանում: Սփյուռքահայերի կրթությունը կազմակերպվում է բոլոր ուսումնական աստիճաններում (միջին մասնագիտական, բակալավրի, մագիստրոսի, ասպիրանտի, դոկտորանտի), ուսուցման բոլոր ձեւերով՝ առկա, հեռակա, հեռավար:

2011թ. Երեւանի պետական համալսարան է դիմել 58 հոգի, որից 52-ը' բակալավր, 6-ը' մագիստրատուրա: Ինչպես «Արմենպրես»-ի հետ զրույցում ասաց ԵՊՀ սփյուռքի բաժնի պետ Ալեքսանդր Վիրաբյանը, դիմում են հիմնականում Վրաստանից եւ Ռուսաստանից: Այս տարի մայր բուհ են դիմել նաեւ Սիրիայից' 2, Բելառուսից' 2, ԱՄՆ-ից' 3, Աֆղանստանից' 1, Աբխազիայից' 1 ուսանող: «Հայաստանում սովորելու հանգամանքը պայմանավորված է ուսման վարձերի ցածր գներով: Իրենց երկրներում կրթություն ստանալը բավականին թանկ է:Բացի այդ, կա նաեւ հայապահպանման խնդիր»,- ասաց ԵՊՀ սփյուռքի բաժնի պետը:

Խաչատուր Աբովյանի անվան պետական մանկավարժական համալսարանի առաջին կուրս ընդունվել է 53 ուսանող, նախապատրաստական' 8, հեռակա' 16, մագիստրատուրա' 13, ասպիրանտուրա' 2: Բուհի սփյուռքի բաժնի աշխատակից Անահիտ Հովնանյանի խոսքերով' Հայաստան գալիս են սովորելու, քանի որ այստեղ ընդունելությունը հեշտացված է նրանց համար. ընդունվում են հարցազրույցով: Մանկավարժական համալսարանում հիմնականում նախընտրում են հայագիտության ֆակուլտետները, Իրանից դիմում են կերպարվեստի եւ պարարվեստի բաժիններ, քանի որ իրենց մոտ արգելված է նման տեղերում սովորելը: Այս համալսարան դիմողների գերակշիռ մասը եւս Վրաստանից ու Ռուսաստանից են: Դիմում են նաեւ Սիրիայից, Լիբանանից, ԱՄՆ-ից, Մեքսիկայից:

Երեւանի Կոմիտասի անվան պետական կոնսերվատորիայի առաջին կուրս է ընդունվել 17 ուսանող, նախապատրաստական' 4:Նրանք հիմնականում նախընտրում են վոկալի բաժինը եւ դիմում են հիմնականում Վրաստանից, Ռուսաստանից, Իրանից: Կոնսերվատորիայի միջազգային կապերի գծով պրոռեկտոր Արկադի Ավանեսյանն «Արմենպրես»- ի հետ զրույցում նշեց, որ արդեն երեք տարի է, ինչ Հայաստանի եւ սփյուռքի ուսանողների համար վարձավճարների տարբերություն չկա: «Սփյուռքի նախարար Հրանուշ Հակոբյանը նամակ-խնդրանքով դիմեց մեզ, որպեսզի արտերկրից եկող ուսանողների համար վարձի տարբերություն չլինի, եւ մենք ընդառաջեցինք: Մեզ մոտ ուսման վարձը բոլորի համար 600 հազար դրամ է»,- ասաց նա:

Նման մեխանիզմ է նաեւ Մանկավարժական համալսարանում: «Սփյուռքն ուսուցիչների կարիք ունի, իսկ մեզ հիմնականում դիմում են Ախալքալակից, ինչպե՞ս կարող ենք նրանց համար ավելի բարձր գին սահամանել»,-ասաց բուհի սփյուռքի բաժնի աշխատակից Անահիտ Հովնանյանը:

Օտարերկրյա ուսանողների համար տարեկան ուսման վարձը, որպես կանոն, ավելի բարձր է, քան Հայաստանի քաղաքացիների համար: Ի տարբերություն Կոնսերվատորիայի եւ Մանկավարժականի, պետական մյուս հաստատություններում Հայաստանի եւ այլ պետություններից ժամանած ուսանողների համար ուսման վարձի տարբերությունը 200.000-250.000 դրամ է:

Օտարերկրացի ուսանողների մեծ մասի համար Հայաստանը հաճելի երկիր է սովորելու եւ ապրելու համար: