Տ. Սարգսյան. «Հայաստանին վերաբերող գնահատականներն օբյեկտիվ վերլուծության արդյունք են»

ԵՐԵՎԱՆ, 8 ՍԵՊՏԵՄԲԵՐԻ, ԱՐՄԵՆՊՐԵՍ: Ազգային մրցունակության զեկույցում Հայաստանին վերաբերող գնահատականներն օբյեկտիվ վերլուծության արդյունք են: Հայաստանի Հանրապետության կառավարության այսօրվա նիստում նման գնահատականով հանդես եկավ վարչապետ Տիգրան Սարգսյանը' ընդգծելով, որ այս զեկույցի տվյալների համաձայն' Հայաստանը վեց աստիճանով առաջ է շարժվել: «Չափազանց կարեւորում եմ մեր ուժեղ եւ թույլ կողմերին անդրադառնալը, որոնց շնորհիվ մեր մրցունակության վարկանիշը բարձրանում է: Բավական օբյեկտիվ վերլուծություն է, որտեղ ներկայացված են, առաջին հերթին, մեր մրցունակության թույլ կողմերը եւ մատնանշված են այն կոնկրետ չափանիշները, որոնք մենք պետք է բարելավենք: Միեւնույն ժամանակ ուրախալի է, որ գրեթե բոլոր ցուցանիշներով լուրջ առաջընթաց ունենք: Առաջընթացը կլիներ շատ ավելի բարձր, եթե չլիներ մեկ գործակից, որը 15 կետով մեզ հետ է մղել. դա բարձր գնաճն է, որն արձանագրվել է 2010 թ-ին, եւ այդ ցուցանիշով 15 քայլ նահանջել ենք: Մնացած բոլոր ցուցանիշներով ունենք լուրջ առաջընթաց»,- ասաց Կառավարության ղեկավարը: Նրա խոսքով'մեր ուժեղ կողմերը, որտեղ մենք մրցունակ ենք, պետական քաղաքականության թափանցիկության աստիճանն է. 142 երկրների շարքում թափանցիկության աստիճանով Հայաստանը զբաղեցնում է 35-րդ տեղը: «Մենք նաեւ ենթակառուցվածքների տեսակետից 48 քայլ առաջ ենք շարժվել հենց տեղեկատվական տեխնոլոգիաների բնագավառում: Առաջին հերթին դա վերաբերում է բջջային հեռախոսների հասանելիությանը, ինտերնետի բնագավառում կատարված փոփոխություններին. ինտերնետի հասանելիությունը Հայաստանում նույնպես էապես բարելավվել է' ե'ւ գներն են նվազել, ե'ւ սպառողների քանակն է ավելացել: Մենք նաեւ լուրջ առաջընթաց ունենք բարձրագույն կրթության եւ վերապատրաստման ոլորտներում' 17 եւ 19 քայլով: Մասնավորապես' միջնակարգ կրթության ներգրավվածության աստիճանով 52-րդ տեղում ենք, իսկ բարձրագույն կրթության ներգրավվածությամբ' 49-րդ տեղն ենք զբաղեցնում 142 երկրների շարքում»,- ասաց Տ. Սարգսյանը' համոզմունք հայտնելով, որ 2011 թ-ի տվյալների հիման վրա Ազգային մրցունակության զեկույցը կլինի ավելի լավը:

Վարչապետի խոսքով' այդ բարելավումը մասնավորապես պայմանավորված է լինելու այն հանգամանքով, որ գնաճը կտրուկ նվազում է 2010 թ-ի համեմատ, եւ 2011 թ-ին արդեն մտել ենք գնաճային նոր փուլ, որն արդեն ոչ թե 10 տոկոսային, այլ 5 տոկոսային շրջանակի մեջ է:

Տ. Սարգսյանը կարեւորեց նաեւ այն բարեփոխումները, որոնք իրականացվել են բիզնես միջավայրը բարելավելու ուղղությամբ: «Հինգ ցուցանիշներով մենք այստեղ լուրջ առաջընթաց ենք արձանագրելու 2011 թ-ի արդյունքներով»,- վստահեցրեց Կառավարության ղեկավարը:

Անդրադառնալով «Fitch Ratings» միջազգային վարկանիշային կազմակերպության հրապարակած Հայաստանի Հանրապետության վարկանիշին' Տ. Սարգսյանն այն բավական օբյեկտիվ համարեց: «Այստեղ նույնպես օբյեկտիվորեն վերլուծված են մեր հարաբերական առավելությունները եւ թույլ կողմերը:

Այդ տեսակետից մեր ընդդիմախոսների եւ վերլուծաբանների ուշադրությունը պետք է հրավիրեմ այս զեկույցների վրա, որտեղ օբյեկտիվ ցուցանիշների հիման վրա բացահայտվում են մեր առջեւ ծառացած լրջագույն մարտահրավերներն ու խնդիրները, միեւնույն ժամանակ օբյեկտիվորեն ներկայացվում են մեր առավելությունները»,- ասաց Տ. Սարգսյանը' բոլորի ուշադրությունը հրավիրելով արտաքին պարտքի ցուցանիշին: Զեկույցում նշված է, որ BB վարկանիշ ունեցող երկրների շրջանակում Հայաստանի Հանրապետության արտաքին բեռը գտնվում է կառավարելիության մակարդակում, եւ միջին ցուցանիշից բեռն ավելի ցածր է նմանատիպ երկրների համար: «Այսինքն, իրականում պետք չէ ուռճացնել արտաքին պարտքի բեռի խնդիրը: Այսօր այն գտնվում է 40 տոկոսի շրջանակում եւ ամբողջությամբ բաղկացած է երկարաժամկետ ու արտոնյալ վարկերից, որոնք մենք ստացել ենք միջազգային կազմակերպություններից»,- ասաց վարչապետը: