Ս. Օհանյան. «Զորահանդեսով չի որոշվում Զինված ուժերի մարտունակությունը»
2 րոպեի ընթերցում
![Ս. Օհանյան. «Զորահանդեսով չի որոշվում Զինված ուժերի մարտունակությունը»](http://armenpress.am/resized/480/static/news/b/2011/08/662226.jpg)
ԵՐԵՎԱՆ, 30 ՕԳՈՍՏՈՍԻ, ԱՐՄԵՆՊՐԵՍ: «Սեպտեմբերի 21-ին մենք հասարակությանը կներկայացնենք 20 տարիների ընթացքում մեր ունեցած ձեռքբերումները: Դրա մեջ կարեւոր մաս է կազմում զինվորների պատրաստությունը»,- այսօր լրագրողների հետ ճեպազրույցում նշեց Հայաստանի Հանրապետության պաշտպանության նախարար Սեյրան Օհանյանը:
Անդրադառնալով այն հարցին, թե արդյոք սեպտեմբերի 21-ի զորահանդեսը պատասխան կլինի հուլիսի 26-ին Բաքվում կայացած շքերթին'նախարարը նշեց' զորահանդեսով չէ, որ պետք է որոշվի ԶՈւ-ի մարտունակությունը. այն մենք ցույց ենք տվել Արցախյան ազատամարտի օրերին: Նախարարի խոսքով' Ադրբեջանն ապագորեն սպառազինվում է, սակայն Հայաստանը եւս համալրում է իր սպառազինությունները: «Սակայն մենք նաեւ բարձրացնում ենք մեր զինվորների պատրաստությունը»,- նկատեց նա: Նախարարի խոսքով' ցանկացած տեխնիկա դառնում է մետաղյա ջարդոն, եթե զինվորը չունի համապատասխան պատրաստվածություն: Ս. Օհանյանն անդրադարձավ նաեւ ԶՈւ-ում հոգեւոր ծառայությանը եւ նշեց, որ սեպտեմբերի 21-ի զորահանդեսին մասնակցելու է հոգեւորականների զորագունդ:
Հոգեւոր ծառայությունը ՀՀ ԶՈւ-ում ներդրվել է 1997 թ-ին: Վերջին տարիներին, նախարարի խոսքով, հայ հոգեւորականները շարունակել են պատմական բարի ավանդույթ հանդիսացող' զինվորականության եւ հոգեւորականության կապը: Ս. Օհանյանը կարեւորեց հոգեւոր ծառայությունը նաեւ զիվորների դաստիարակության առումով' նշելով, որ դա ամրապնդում է մարտական ոգին: