Ինչո՞ւ է Ադրբեջանը նամակներ ուղղում ՄԱԿ-ի գլխավոր քարտուղարին եւ ոչ ՄԽ համանախագահներին

ԵՐԵՎԱՆ, 17 ՕԳՈՍՏՈՍԻ, ԱՐՄԵՆՊՐԵՍ: ՄԱԿ-ում Ադրբեջանի մշտական ներկայացուցիչ Ագշին Մեհտիեւը նամակ է ուղղել կազմակերպության գլխավոր քարտուղար Բան Կի -Մունին, որում ասվում է, թե իբր հայկական կողմը շարունակաբար խախտում է հրադադարի ռեժիմը ղարաբաղա-ադրբեջանական զորքերի շփման գծում: Մասնավորապես, վկայակոչվում են ադրբեջանցի 13-ամյա աղջկա սպանության մասին լուրերը: Նա, ըստ ադրբեջանական վարկածի, սպանվել էր խաղալիքի մեջ տեղադրված ռումբի պայթյունից, որը նպատակադրված կերպով գետի մեջ էր նետել հայկական կողմը:

«Սա էլ եւս մեկ եղանակ է խոչընդոտելու բանակցային գործընթացը: Ինչո՞ւ է Ադրբեջանը նամակներ ուղղում ՄԱԿ-ի գլխավոր քարտուղարին, ինչո՞ւ դրանք չի ուղարկում ԵԱՀԿ Մինսկի խմբի համանախագահներին կամ համանախագահող երկրներին»,- մեկնաբանելով այս իրադարձությունը' «Արմենպրես»-ի հետ զրույցում նշեց Լեռնային Ղարաբաղի Հանրապետության նախագահի աշխատակազմի տեղեկատվության գլխավոր վարչության պետ, քաղաքագետ Դավիթ Բաբայանը:

Նրա կարծիքով' Ադրբեջանը որդեգրել է սարսափ ֆիլմերից ինչ-որ դրվագներ ցուցադրելու քաղաքականություն, որտեղ փորձում է ցույց տալ հայկական կողմին որպես «երեխասպանի», որը ոչ մի բանի առջեւ կանգ չի առնում:

«Իհարկե ե'ւ Բան Կի- Մունը, ե,ւ այլ առաջնորդներ եւս հասկանում են, որ դա սուտ է, բայց Ադրբեջանը իր համար ստեղծած վիրտուալ աշխարհում անցնում է չափ ու սահմանը' ինքն իրեն ողորմելի վիճակում դնելով»,- շեշտեց Դ.Բաբայանը: Եթե իրոք կան նման երեւույթներ, ապա պետք է առաջին հերթին դիմել ԵԱՀԿ Մինսկի խմբի համանախագահող երկրներին. «թող գան եւ ստուգեն տեղում, բայց, իհարկե, Ադրբեջանը չի դիմում, որովհետեւ գիտի, որ ստուգման պարագայում պարզվելու է' Ադրբեջանն ուղղակի լկտիաբար ստում է»:

Քաղաքագետի կարծիքով' Ադրբեջանը ՄԱԿ-ում սեւ PR-ով է զբաղված եւ չի ձգտում գործընթացը տանել կառուցողական հունով: «Դրան միջազգային հանրությունը պետք է շատ լուրջ վերաբերվի, որովհետեւ այդ պետությունը քաղաքական շատ վտանգավոր փուլ է մտել, երբ իրականությունն ու վիրտուալ աշխարհներն իրարից չեն տարբերվում. դա շիզոֆրենիայի մի տարբերակ է»,- կարծում է Դ.Բաբայանը:

Նշենք նաեւ, որ այսօր ՄԱԿ-ում տարածվել է կազմակերպությունում ՀՀ մշտական ներկայացուցիչ, դեսպան Կարեն Նազարյանի նամակը' ուղղված ՄԱԿ-ի գլխավոր քարտուղարին, որում մասնավորապես նշվում է, որ Ադրբեջանի նշտական ներկայացուցչի նամակը հերթական անգամ «նախնական հետաքննության եզրակացությունների» վրա հիմնված կեղծիքների եւ ստերի միջոցով հայկական կողմին վարկաբեկելու հատուկ նպատակ է հետապնդում: