«Նաիրիտ»-ի սեփականատերերի ցանկում հայաստանցի պետական այր չկա
2 րոպեի ընթերցում
![«Նաիրիտ»-ի սեփականատերերի ցանկում հայաստանցի պետական այր չկա](http://armenpress.am/resized/480/static/news/b/2011/07/658378.jpg)
ԵՐԵՎԱՆ, 13 ՀՈւԼԻՍԻ, ԱՐՄԵՆՊՐԵՍ: «Նաիրիտ»-ի սեփականատերերի ցանկում Հայաստանից որեւէ պետական այր չկա: Այս մասին այսօր ասաց ՀՀ էներգետիկայի եւ բնական պաշարների նախարար Արմեն Մովսիսյանը կիսամյակային ամփոփիչ ասուլիսի ժամանակ:
«Լուրեր են շրջանառվում, թե «Նաիրիտ»-ի սեփականատարերը իշխանության ներկայացուցիչներից են: Պաշտոնապես հայտարարում եմ, որ որեւիցե հայաստանցի պետական այր «Նաիրիտ»-ի սեփականատերերի ցանկում չկա: Այդ ցանկում չկա նաեւ ՀՀ վարչապետ Տիգրան Սարգսյանը»,- նշեց Ա. Մովսիսյանը:
Ա. Մովսիսյանն անդրադարձավ նաեւ այն խոսակցություններին, ըստ որոնց, վարչապետի եղբայրը կապ ունի «Նաիրիտ Շանսին»-ի կառավարման հետ: Լուրեր են շրջանառվում նաեւ, որ նախարար Արմեն Մովսիսյանն Ուկրաինայի լեռնամետալուրգիական ամենախոշոր ընկերության 80 տոկոսի սեփականատերն է:
«Նման խոսակցություններն իրականությանը չեն համապատասխանում»,-ասաց նախարարը:
Անդրադառնալով «Նաիրիտ»-ի հետ կապված ներկա գործընթացներին' նա նշեց, որ երկար քննարկումներից հետո նոր ծրագիր է մշակվել: Ըստ Ա. Մովսիսյանի' այն բավականին մեծ ծրագիր է եւ հնարավորություն կտա «Նաիրիտ»-ը վերագործարկել:
«Փորձում ենք կառավարիչ գտնել այդ ծրագիրն իրագործելու համար: Ծրագիրն իրագործելու դեպքում «Նաիրիտ»-ը կշահագործվի այսօրվա պահանջներին համապատասխան' նորմալ արտադրական ռիթմով»,- տեղեկացրեց Ա. Մովսիսյանը: Նա նշեց, որ հետաքրքրված է գերմանական մի ընկերություն, որին հրավիրել են Հայաստան բանակցություններ իրականացնելու համար: Նախարարի խոսքով' ընկերությունն այդ ոլորտում բավականին մեծ փորձ ունի: Նա հույս հայտնեց, որ բանակցություններն արդյունավետ կընթանան:
Այն հարցին, թե երբ կվճարվեն «Նաիրիտ»-ի աշխատողների աշխատավարձերը, նախարարը պատասխանեց, որ այդ հարցը քննարկման փուլում է, հստակեցման դեպքում կհրապարակեն տվյալները: