2 րոպեի ընթերցում
ԵՐԵՎԱՆ, 27 ՀՈՒՆԻՍԻ, ԱՐՄԵՆՊՐԵՍ: Առաջիկա ընտրություններն էապես կտարբերվեն նախորդներից կազմակերպման եւ անցկացման իմաստով: Ինչպես այսօր լրագրողների հետ զրույցում նշեց Կենտրոնական ընտրական հանձնաժողովի նախագահ Գարեգին Ազարյանը, հրապարակայնության ապահովման, արդյունքներն ավելի մատչելի դարձնելու առումով նույնպես զգալի տարբերություններ կան:
«Հանձնաժողովն ակտիվորեն ներգրավված է եղել ՀՀ ընտրական օրենսգրքի բարեփոխումներին: Մեր ներգրավվածությունը կարեւորվում է, որովհետեւ յուրաքանչյուր առաջարկ կատարել ենք' հաշվի առնելով ունեցած փորձը, ելնելով նախորդ ընտրություններից»,-ասաց Գ. Ազարյանը: Նրա խոսքով' հաշվի են առել տարբեր ընտրությունների վերաբերյալ միջազգային դիտորդական առաքելությունների կողմից ներկայացված առաջարկությունները, ինչպես նաեւ Ազգային ժողովի պատգամավորների դիտարկումները:
Անդրադառնալով արտախորհրդարանական ընդդիմության կողմից արված' ընտրություններին 2 հազար միջազգային դիտորդ ունենալու առաջարկին' ԿԸՀ նախագահը նշեց, որ միջազգային դիտորդների առկայությունը որքան շատ, այնքան լավ, սակայն 2 հազար թիվը ռեալ չէ: «Չեմ հասկանում, եթե ունենանք 2 հազար միջազգային դիտորդ, ապա ինչո՞վ պետք է զբաղվեն կուսակցությունների վստահված անձինք: Չմոռանանք, որ նրանք ունեն ավելի մեծ իրավունքներ, քան դիտորդները»,-ասաց Գ. Ազարյանը' ավելացնելով, որ մասնակիցն ինքը պետք է իրականացնի ընտրությունների վերահսկողության գործառույթը, այլ ոչ թե դիմի դրսից մարդ հրավիրելու մոտեցմանը: