Հ. Թովմասյան. «Սահմանադրությամբ արտահերթ ընտրությունների անցկացման համար նախատեսված հիմքերից ոչ մեկը չկա»
1 րոպեի ընթերցում
ԵՐԵՎԱՆ, 7 ՀՈՒՆԻՍԻ, ԱՐՄԵՆՊՐԵՍ: Արտահերթ խորհրդարանական ընտրություններ անցկացնելու իրավական ճանապարհ այսօր գոյություն չունի: Այս մասին այսօր «Սիվիլիթաս» հիմնադրամի կազմակերպած քննարկման ժամանակ ասաց Հայաստանի Հանրապետության արդարադատության նախարար Հրայր Թովմասյանը' պատասխանելով այն հարցին, թե իրավական տեսանկյունից որքանով է հնարավոր իրականացնել արտահերթ ընտրություններ, ինչպես պահանջում է Հայ ազգային կոնգրեսը:
Հ. Թովմասյանը հիշեցրեց, որ այսօր Հայաստանի խորհրդարանի լուծարման բացարձակ իրավունք այլեւս չկա: «Եթե նախկինում նախագահը կարող էր անգամ քաղաքական նկատառումներով լուծարել խորհրդարանը, ապա այժմ' 2005 թվականին ընդունված Սահմանադրությամբ, հստակ սահմանված են այն հիմքերը, երբ կարող է լուծարվել խորհրդարանը: Ներկայում Սահմանադրությամբ արտահերթ ընտրությունների անցկացման համար սահմանված հիմքերից ոչ մեկը գոյություն չունի: Ուստի խորհուրդ կտայի մինչեւ պահանջներ դնելը նայել, թե որքանով են դրանք Սահմանադրությունից բխում»,- ընդգծեց Հ. Թովմասյանը: