1 րոպեի ընթերցում
ԵՐԵՎԱՆ, 26 ՄԱՅԻՍԻ, ԱՐՄԵՆՊՐԵՍ: Այս տարվա առաջին չորս ամիսների ընթացքում Հայաստանի Հանրապետության տարածքում գրանցվել է 574 ճանապարհատրանսպորտային պատահար, որոնց հետեւանքով զոհվել է 60, մարմնական տարբեր աստիճանի վնասվածքներ ստացել 832 մարդ: Այս մասին այսօր լրագրողների հետ հանդիպման ժամանակ նշեց ՀՀ Ճանապարհային ոստիկանության ճանապարհապարեկային ծառայության պետ, գնդապետ Նորիկ Սարգսյանը' հավելելով, որ անցյալ տարվա նույն ժամանակահատվածի համեմատ պատահարների թիվն ավելացել է 74-ով, սակայն 16-ով կրճատվել է մահվան ելքով դեպքերի քանակը:
«Ճանապարհատրանսպորտային պատահարների կրճատումը շատ բարդ խնդիր է, սակայն ավելի առաջնային է այդ միջադեպերում մահվան ելքով դեպքերի կրճատումը, որի իրականացման համար Ոստիկանությունը գործադրում է ամեն տեսակի ջանքեր»,- ասաց Ն. Սարգսյանը' հավաստիացնելով, որ պատահարների մեծ մասը գրանցվում է վարորդների կողմից արագությունը խախտելու հետեւանքով, որոնք կազմում են գրանցված 574 պատահարից 224-ը:
«Պետք է ապացուցել վարորդներին, որ արագության խախտումը կարող է հանգեցնել աններելի միջադեպերի' միաժամանակ չթերագնահատելով ճանապարհային մյուս կանոնները»,- ընդգծեց ՀՀ Ճանապարհային ոստիկանության ճանապարհապարեկային ծառայության պետը: