Ռումբի վերաբերյալ կեղծ ահազանգերի թվի ավելացումը չի կարող թուլացնել իրավապահ մարմինների զգոնությունը
2 րոպեի ընթերցում
![Ռումբի վերաբերյալ կեղծ ահազանգերի թվի ավելացումը չի կարող թուլացնել իրավապահ մարմինների զգոնությունը](http://armenpress.am/resized/480/static/news/b/2011/05/653403.jpg)
ԵՐԵՎԱՆ, 24 ՄԱՅԻՍԻ, ԱՐՄԵՆՊՐԵՍ: «Ռումբի վերաբերյալ կեղծ ահազանգերի պարբերաբար առկայությունն անառողջ մթնոլորտ է ստեղծում հասարակության շրջանում»,- «Արմենպրես»-ի հետ զրույցում նման տեսակետ հայտնեց հոգեբան Կարինե Նալչաջյանը' հավելելով, որ կեղծ ահազանգի հիմքում միշտ ընկած է ինչ-որ մեկին վնաս պատճառելու հանգամանքը: «Դա կարող է ուղղված լինել կոնկրետ անձի կամ կառույցի, համակարգի դեմ: Այստեղ ագրեսիվ մոտեցումն ակնհայտ է»,-ասաց Կ. Նալչաջյանը:
Հոգեբանի կարծիքով' ռումբի վերաբերյալ ահազանգերը, հոգեբանական տեսանկյունից, իրենց ազդեցությունն են ունենում հասարակության վրա: Դրանք տագնապի որոշակի հոգեվիճակ են ստեղծում:»Նույնիսկ, եթե պարզվում է, որ ահազանգը կեղծ է, միեւնույն է' մարդկանց մոտ կասկածի տարր կարող է մնալ: Նման դեպքերում հասարակության շրջանում անվստահության մթնոլորտ է ստեղծվում, եւ դրանով ձեւավորվում է անառողջ իրավիճակ»,-ասաց Կ. Նալչաջյանը: Նրա խոսքով' չի բացառվում, որ կեղծ ահազանգերի պարբերաբար առկայությունն ուղղված է նաեւ իրավապահ մարմինների զգոնության թուլացմանը:
ՀՀ ոստիկանության լրատվական ծառայությունից տեղեկացրեցին, որ ոստիկաններն արագ եւ օպերատիվ արձագանքում են յուրաքանչյուր ահազանգին: Կեղծ ահազանգերի թվի ավելացումը չի կարող թուլացնել իրավապահ մարմինների զգոնությունը: