2 րոպեի ընթերցում
ԵՐԵՎԱՆ, 5 ՍԵՊՏԵՄԲԵՐԻ, ԱՐՄԵՆՊՐԵՍ(թղթ. Վանիկ Սանթրյան): Ծննդյան 70- ամյակը գեղանկարիչ Համբարձում Սահակյանը դիմավորեց անհատական ցուցահանդեսով: Այն հանդիսավորապես բացվեց այսօր, Հայաստանի նկարչի տանը: Բացման արարողությունը կատարեց Հայաստանի նկարիչների միության նախագահ Կարեն Աղամյանը, որը մասնավորապես գնահատեց այն, որ նկարիչը չգիտե հոգնությունը, այսօր էլ եռանդուն աշխատում, ստեղծագործում է: Ելույթ ունեցողները՝ Արեւշատ Ավագյան, Վալերի Միրզոյան եւ ուրիշներ նույնպես նշեցին, որ նկարիչը հայկական կերպարվեստ է բերել իր ուրույն գույներն ու ոճը, ստեղծել շատ ուշագրավ աշխատանքներ: Ելույթ ունեցողների թվում էր անվանի նկարիչ Անատոլի Պապյանը, որի մոտ տարիներ առաջ սովորել է Սահակյանը: Ուսուցիչը հատկապես խոսեց իր աշակերտի սիրով, քնքշանքով ու լավատեսությամբ շաղախված արվեստի մասին, որոնք դրսեւորված են բոլոր աշխատանքներում: Ներկաներին շնորհակալություն հայտնելուց հետո Հ. Սահակյանը ԱՐՄԵՆՊՐԵՍԻ թղթակցին ասաց, որ իր նկարչությունը իր կյանքն է: Ուստի ներկայացրել է տարբեր տասնամյակներում ստեղծած տարբեր գործեր, որոնք սկիզբ են առնում դեռեւս անցյալ դարի 60-ական թվականներից: Դրանք էտյուդներ են, կոմպոզիցիաներ, դիմանկարներ, բնանկարներ եւ այլն: Նկարչի տանը նախորդ ցուցահանդեսից հետո անցել է ավելի քան 20 տարի, եւ նկարիչը այդ երկար բացակայությունը բացատրում է իր եւ անձի, եւ աշխատանքի նկատմամբ ունեցած պատասխանատվությամբ: Ըստ նրա, շատ նկարներ ինքը լվացել- մաքրել է, սակայն շնորհակալություն է հայտնում ընկերներին, որոնք դրանց մի մասը պարզապես խլել են իր ձեռքից, փրկել կորստից: Համբարձում Սահակյանը ծնվել է Երեւանում: Ավարտել է Թերլեմեզյանի անվան ուսումնարանը եւ Գեղարվեստաթատերական ինստիտուտը ու ավելի քան 40 տարի է, ինչ մասնակցում է հանրապետական, միութենական եւ միջազգային ցուցահանդեսների: Անհատական ցուցահանդեսներ է բացել Երեւանում, Մոսկվայում, Բելգրադում, Դոնեցկում, Մարիուպոլում, Կատմանդուում: Նրա աշխատանքները պահվում են տարբեր քաղաքների պատկերասրահներում եւ մասնավոր հավաքորդների մոտ: