1 րոպեի ընթերցում
Հունգարիայի վարչապետ Պետեր Մագյարը չեխ-հունգարական կառավարությունների առաջին համատեղ նիստը որակել է որպես պատմական՝ բարձր գնահատելով Վիշեգրադյան խմբի շրջանակում իրականացվող համագործակցությունը։ Այդ մասին տեղեկացնում է «Արմենպրես»-ը՝ վկայակոչելով Euronews-ը։
Երկու առաջնորդները հաստատել են, որ նման միջկառավարական խորհրդակցությունների երկրորդ փուլը տեղի կունենա գարնանը Բուդապեշտում։
Չեխ-հունգարական միջկառավարական խորհրդակցություններից հետո կայացած մամուլի ասուլիսում Չեխիայի վարչապետ Անդրեյ Բաբիշը հայտարարել է, որ կողմերը պայմանավորվել են նման համատեղ հանդիպումները դարձնել պարբերական՝ հնարավորություն տալով անդրադառնալու երկու երկրների ժողովուրդների համար կարևորություն ունեցող կոնկրետ խնդիրներին։
Բաբիշը հավելել է, որ Հունգարիան և Չեխիան պետք է համագործակցեն՝ ԵՄ-ի հաջորդ յոթնամյա բյուջեի շրջանակներում զգալի աջակցություն ապահովելու համար բարձր արագությամբ երկաթուղային նախագծի իրականացման նպատակով, որի արժեքը գերազանցում է 10 միլիարդ եվրոն։ Մերձբալթյան երկրներն արդեն իսկ ստացել են ԵՄ ֆինանսավորում նմանատիպ նախագծի համար։ Պլանավորման փուլից ներդրումային ծրագրի բուն իրականացմանն անցնելը կարող է տևել 10–12 տարի։