Զելենսկին նոյեմբերի սկզբին ՌԴ-ի և ԱՄՆ-ի հետ եռակողմ հանդիպման հույս ունի. նա նշել է նախատեսվող թեմաները

ԱՄՆ-ն առաջարկում է հնարավորինս շուտ անցկացնել նոր եռակողմ հանդիպում ամերիկացի, ուկրաինացի և ռուսաստանցի բանակցողների միջև՝ Ռուսաստանի և Ուկրաինայի միջև պատերազմի ավարտի հարցով։ Քննարկվում է նաև երկրների առաջնորդների միջև հնարավոր բանակցությունների հարցը։ Ինչպես հաղորդում է «Արմենպրես»-ը՝ վկայակոչելով «ՌԲԿ-Ուկրաինա»-ն, այս մասին հայտարարել է Ուկրաինայի նախագահ Վոլոդիմիր Զելենսկին՝ պատասխանելով լրագրողների հարցերին։

Ուկրաինայի նախագահի խոսքով՝ հոկտեմբերի 21-ին ԱՄՆ հատուկ ներկայացուցիչ Սթիվ Ուիթքոֆի հանդիպումը ռուսական կողմի հետ կարևոր էր։

«Մենք հետադարձ կապ ենք ստացել, որ Ռուսաստանն աջակցում է մեր թիմերի մակարդակով եռակողմ հանդիպմանը։ Ամերիկյան կողմն առաջարկում է դա անել հնարավորինս շուտ։ Մենք աջակցում ենք դրան», - ասել է Զելենսկին։

Նա դեռևս չի նշել այդ հանդիպման վերջնական ամսաթիվը։

«Մենք խոսել ենք մեր ամերիկացի գործընկերների հետ։ Կանեն այնպես, որ դա տեղի ունենա հնարավորինս շուտ՝ նոյեմբերին։ Կարծում եմ՝ ոչ ուշ, քան նոյեմբերի սկիզբը։ Դե, կտեսնենք, ամեն ինչ չէ, որ մեզնից է կախված», - նշել է Զելենսկին։

Ուստի, նախագահի խոսքով, երեք երկրների թիմերը կշփվեն հետևյալ ուղղություններով։

«Օրակարգը հասկանալի է՝ ավարտել պատերազմը, մոտեցնել խաղաղությունը և նախապատրաստել ամեն ինչ առաջնորդների մակարդակով հանդիպման համար։ Եվ սա շատ կարևոր է բոլորի համար։ Առնվազն մեզ՝ Ուկրաինայի համար, շատ կարևոր է։ Մենք միշտ ընդգծում ենք դա», - նշել է նա։

Զելենսկին ուրվագծել է բանակցությունների այն ուղղությունները, որոնց կաջակցի Ուկրաինան։

«Մենք կաջակցենք և՛ հրադադարի, և՛ պատերազմի ավարտի, և՛ էներգետիկ հրադադարի՝ ցանկացած հրադադարի, ցանկացած դեպքում, ինչպես նաև մարդասիրական նախաձեռնությունների, գերիների վերադարձի և դիվանագիտության առաջարկին», - հստակեցրել է նախագահը։

Նա կարծիք է հայտնել, որ այս բոլոր բանակցություններում գլխավոր նախաձեռնությունն ու գլխավոր ազդակն առայժմ դրական են։

«Մեր կողմից կա ամերիկյան առաջարկներին լիակատար աջակցություն։ Հույս ունենք, որ Ռուսաստանը, իսկ նա արդեն բազմիցս ասել է, պատրաստ է հանդիպման այս կամ այն ձևաչափով։ Հետո ինչ-որ բան փոխվում էր, չեղարկվում, կտեսնենք՝ այս անգամ ինչպես կլինի», - ասել է Ուկրաինայի նախագահը։

Զելենսկին կարծում է, որ գլխավոր գաղափարն է հնարավորինս շուտ հանդիպել, սկսել աշխատանքը և մշակել «այն խաղաղությունը, որն անհրաժեշտ է մեզ»։

Ռուսաստանի նախագահ Վլադիմիր Պուտինը հոկտեմբերի 21-ին Սանկտ Պետերբուրգում ԱՄՆ նախագահի հատուկ բանագնաց Սթիվ Ուիթքոֆի հետ հանդիպման ժամանակ հայտարարել է Վաշինգտոնի և Կիևի հետ եռակողմ բանակցությունների նոր փուլ սկսելու պատրաստակամության մասին։

Հոկտեմբերի 20-ին Ուիթքոֆն Օսլոյում հանդիպել էր Ուկրաինայի նախագահ Վոլոդիմիր Զելենսկու, Նորվեգիայի վարչապետ Յոնաս Գար Ստյորեի և Ֆինլանդիայի նախագահ Ալեքսանդր Ստուբի հետ։