Ինչպես նախագրանցվել՝ կենսաչափական նոր անձնագիր և նույնականացման քարտ ստանալու համար. մանրամասնում է Նելլի Դավթյանը

Հայաստանի քաղաքացիները հոկտեմբերի 31-ից կարող են նախագրանցվել՝ կենսաչափական նոր անձնագիր և նույնականացման քարտ ստանալու համար։ 

«Արմենպրես»-ի  հետ զրույցում Հայաստանի ներքին գործերի նախարարության միգրացիայի և քաղաքացիության ծառայության պետ Նելլի Դավթյանը մանրամասներ է ներկայացրել գործընթացի վերաբերյալ։

Նախագրանցման հարթակը հասանելի կլինի Միգրացիայի և քաղաքացիության ծառայության և գործընթացը սպասարկող մասնավոր «Հայփաս» ընկերության պաշտոնական կայքերում։

«Նախագրանցում իրականացնելու համար ամենաապահով և արագ ճանապարհը խիստ նույնականացում անցնելն է, ինչի համար անհրաժեշտ է էլեկտրոնային ստորագրության առկայություն։ Խիստ նույնականացմամբ նախագրանցվելու համար քաղաքացուց վայրկյաններ է պահանջվելու, իսկ առանց խիստ նույնականացման դեպքում որոշակի տվյալներ մուտքագրելու անհրաժեշտություն է առաջանալու։ Նույնականացումից հետո քաղաքացին կուղղորդվի վճարման էջ, այնուհետև կկարողանա ընտրել իրեն հարմար սպասարկման գրասենյակ, օր և ժամ։ Կենսաչափական նոր անձնագրի համար քաղաքացիները կվճարեն 28 650 դրամ, իսկ նույնականացման քարտը կարժենա 5950 դրամ»,- ասաց Նելլի Դավթյանը։

Նախնական փուլում «Հայփաս» ընկերության սպասարկման 2 գրասենյակ գործելու է Երևանում, 12-ը՝ մարզերում։ Մինչև հաջորդ տարվա փետրվարի ավարտը մարզերում ևս 9 գրասենյակ կբացվի։

«Կենսաչափական նոր անձնագրերը և նույնականացման քարտերը քաղաքացուն կտրամադրվեն 14 աշխատանքային օրվա ընթացքում։ Կունենանք նաև արագացված ծառայություն, որը կգործի հավելավճարով։ Այս պահի դրությամբ արագացված ծառայության արժեքները դեռևս հստակեցված չեն»,- հավելել է Նելլի Դավթյանը։

Մանրամասները՝ տեսանյութում։ 

Նարեկ Առուշանյան