Խաղաղության Նոբելյան մրցանակը շնորհվել է Արդարադատության միջազգային դատարանի դատավոր Նավի Փիլեյին

ՄԱԿ-ի մարդու իրավունքների հարցերով նախկին գերագույն հանձնակատար, Արդարադատության միջազգային դատարանի դատավոր Նավանեթհեմ «Նավի» Փիլեյն Օսլոյում արժանացել է Խաղաղության Նոբելյան մրցանակի։ «Արմենպրես»-ի փոխանցմամբ՝ այս մասին հաղորդագրություն է տարածել Նոբելյան հանձնաժողովը։

Հարավաֆրիկյան Հանրապետությունում ծնված 85-ամյա Փիլեյին մրցանակը շնորհվել է «խաղաղության և միջազգային իրավունքի խթանմանն ուղղված իր ջանքերի համար»։

«2026 թվականի Խաղաղության Նոբելյան մրցանակը շնորհվում է մի մարդու, որը բացառիկ խիզախությամբ և ազնվությամբ առաջնորդել է ավելի համապարփակ համաշխարհային իրավական կարգի ձևավորման գործընթացը։ Այս տարվա դափնեկիրը կարևոր դեր է ունեցել պատերազմական հանցագործությունների, մարդկության դեմ հանցագործությունների և ցեղասպանության համար պատասխանատուներին դատական պատասխանատվության ենթարկելու գործում», - նշված է հաղորդագրության մեջ։

Նոբելյան հանձնաժողովը նշում է, որ այս տարվա դափնեկիրը զգալիորեն ընդլայնել է միջազգային իրավունքի շրջանակներն ու ազդեցությունը։ Նա եղել է Հարավաֆրիկյան Հանրապետության Բարձրագույն դատարանի, Ռուանդայի հարցերով միջազգային քրեական տրիբունալի և Միջազգային քրեական դատարանի դատավոր։ Նա նաև զբաղեցրել է ՄԱԿ-ի մարդու իրավունքների գերագույն հանձնակատարի պաշտոնը, իսկ մինչև վերջերս նախագահել է Պաղեստինի օկուպացված տարածքների հարցերով ՄԱԿ-ի անկախ միջազգային հետաքննող հանձնաժողովը։ Ներկայում Նավի Փիլեյն Արդարադատության միջազգային դատարանի դատավոր է Մյանմայի դեմ քննվող գործով, որում այդ երկիրը մեղադրվում է ցեղասպանություն իրականացնելու համար։

Խաղաղության առաջին Նոբելյան մրցանակը շնորհվել է 125 տարի առաջ։

«Այս տարվա Խաղաղության Նոբելյան մրցանակը շնորհելիս Նորվեգիայի Նոբելյան հանձնաժողովը ցանկանում է աշխարհին հիշեցնել, որ օրենքի գերակայությունը՝ թե՛ ազգային, թե՛ միջազգային մակարդակով, հիմք է ծառայում այն ​​համակարգի համար, որը մենք ստեղծել ենք խաղաղությունն ապահովելու և հակամարտությունները ոչ բռնի ճանապարհով լուծելու նպատակով։ Խաղաղությունը արդարություն է պահանջում», - նշված է հաղորդագրության մեջ։

Հոկտեմբերի 5-ից Նոբելյան մրցանակ է շնորհվել բժշկության, ֆիզիկայի, քիմիայի և գրականության բնագավառներում։