2 րոպեի ընթերցում
Ազգային ժողովի նախկին պատգամավոր Ջուլիետա Ազարյանը նշանակվել է Երևանի քաղաքապետի մամուլի խոսնակի պաշտոնում։
«Արմենպրես»-ի փոխանցմամբ՝ Ջուլիետա Ազարյանն այդ մասին գրել է «Ֆեյսբուք»-ի իր էջում։
«Ինձ համար սա առաջին հերթին մեծ պատասխանատվություն է՝ ներկայացնելու Երևանի քաղաքապետարանի աշխատանքը, քաղաքապետի և քաղաքապետարանի թիմի գործունեությունը, ինչպես նաև ապահովելու հանրության և ԶԼՄ-ների հետ բաց, օպերատիվ և արդյունավետ հաղորդակցություն։
Գիտակցում եմ, որ մամուլի խոսնակի աշխատանքը միայն տեղեկատվություն փոխանցելը չէ։ Այն նաև պատասխանատվություն է՝ լինել հասանելի, ճշգրիտ և հետևողական, լսել հարցերը, ապահովել պատշաճ հաղորդակցություն և հանրությանը ներկայացնել Երևանի կյանքին ու քաղաքային կառավարմանը վերաբերող կարևոր գործընթացները։
Հատկապես ուզում եմ ընդգծել իմ պատրաստակամությունը՝ սերտ և գործընկերային աշխատանք կառուցելու բոլոր լրատվամիջոցների և լրագրողների հետ։
Առանձնահատուկ շնորհակալություն եմ հայտնում Երևանի քաղաքապետ Տիգրան Ավինյանին՝ ցուցաբերած բարձր վստահության և այս պատասխանատու պաշտոնն ինձ վստահելու համար»,-գրել է նա։
Ավելի վաղ Երևանի քաղաքապետի մամուլի խոսնակի պաշտոնից հրաժարական էր ներկայացրել Արտյոմ Կարապետյանը։
Ջուլիետա Ազարյանը նախորդ՝ 8-րդ գումարման Ազգային ժողովի պատգամավոր էր իշխող «Քաղաքացիական պայմանագիր» խմբակցությունում։