Արհեստական ​​բանականությունն առաջին անգամ օգտագործվել է նոր վիրուսներ մշակելու համար

Սթենֆորդի համալսարանի հետազոտողները հայտնել են, որ արհեստական ​​բանականությունն օգտագործվել է նոր վիրուսներ մշակելու համար, որոնք լիովին գործունակ են և կարող են վերարտադրվել լաբորատորիայում։ «Արմենպրես»-ի փոխանցմամբ՝ այս մասին հաղորդում է BBC-ն։

Սա առաջին դեպքն է, երբ արհեստական ​​բանականությունը հաջողությամբ նախագծել է ամբողջական գենոմներ։

Արդյունքում ստացված 16 նոր վիրուսները ստեղծվել են մանրէներ վարակելու համար և մարդկանց համար սպառնալիք չեն ներկայացնում։

Առաջընթացը որակվել է որպես գիտության մեջ «շատ կարևոր շրջադարձային կետ», որը կարող է բացել հիվանդությունների բուժման նոր դարաշրջան։ Սակայն մասնագետները նաև զգուշացրել են, որ արհեստական ​​բանականության կողմից մշակված վիրուսներն «անհետաձգելի» անվտանգության և պաշտպանության հարցեր են առաջացնում։

Արհեստական ​​բանականության մոդելները, որոնք հայտնի են որպես Evo1 և Evo2, մարզվել են վիրուսների, մանրէների, բույսերի և մարդկանց գենետիկական կոդերի վրա։ Այնուհետև դրանք կատարելագործվել են՝ ստեղծելու մի տեսակի վիրուս, որը հայտնի է որպես բակտերիոֆագ, որը վարակում է միայն մանրէների որոշակի տեսակներ։

Տեխնոլոգիան գործում է ChatGPT-ի նման խոշոր լեզվական մոդելների պես, բայց բառերի փոխարեն այն կանխատեսում է ԴՆԹ հաջորդականությունները։

Սթենֆորդի հետազոտողներն ընտրել են ամենախոստումնալից 302 արհեստական ​​բանականության նախագծերը և սինթեզել դրանք լաբորատորիայում: Դրանցից 16-ը արդյունավետ են եղել E. coli բակտերիաները ոչնչացնելու համար։

Փորձին մասնակցած Սեմյուել Քինգը BBC-ին հայտնել է, որ թիմը վաղ առավոտյան նկատել է ֆագերի աշխատանքի ընթացքը. Պետրիի ամանների վրա, որոնք պարունակում էին մանրէներ, հայտնվել են թափանցիկ բծեր՝ նշաններ, որ վիրուսները բազմանում են։

Նոր ֆագի մշակումը կարող է հանգեցնել հակաբիոտիկների նկատմամբ դիմացկուն դարձած վարակների բուժման նոր եղանակների: