Վախճանվել է պոլիոմիելիտով հիվանդ վերջին ամերիկուհին

Պոլիոմիելիտով հիվանդ ԱՄՆ վերջին քաղաքացին՝ Մարթա Էն Լիլարդը մահացել է հունիսի 26-ին՝ 78 տարեկան հասակում։

«Արմենպրես»-ի հաղորդմամբ՝ այս մասին հայտնել է Fox59 հեռուստաալիքը։

Նյարդային համակարգը խոցող և մկանների կաթված առաջացնող վիրուսով կինը վարակվել էր 1953 թվականին՝ ԱՄՆ-ում այս հիվանդության դեմ պատվաստանյութի լայն տարածումից երկու տարի առաջ։ Այն ժամանակ բուժման մեթոդներից մեկը արհեստական շնչառության սարքի կամ, այսպես կոչված, երկաթե թոքի օգտագործումն էր, որը մշակվել էր դեռևս 20-րդ դարի առաջին կեսին։

Մարթան օրական մինչև 23 ժամ էր անցկացնում այդ սարքի մեջ։ Չնայած առողջական վիճակի բարելավմանը՝ կյանքի վերջում նա դարձյալ ստիպված էր օգտվել միակ  սարքից, որը նրան թույլ էր տվել շնչել ավելի քան 70 տարի։ Մահվանից կարճ ժամանակ առաջ Մարթան լրագրողներին տված հարցազրույցում խնդրել էր աջակցել սարքը վերանորոգելու հարցում։ Հունիսի 26-ին նրան անջատել էին սարքից՝ բնական մահվան պատճառով։

«Երկաթե թոքը» մետաղական գլան է։ Հիվանդը պառկում է դրա մեջ՝ դրսում թողնելով միայն գլուխը։ Պոմպը փոխում է ճնշումը գլանի ներսում՝ օդի հոսքը մղելով մարդու օրգանիզմ և այնտեղից դուրս բերելով այն։