Իրանը քննադատել է ՆԱՏՕ-ի գլխավոր քարտուղարի մեկնաբանություններն ԱՄՆ-Իսրայել պատերազմի վերաբերյալ

Իրանի արտաքին գործերի նախարարության խոսնակ Էսմայիլ Բաղային դատապարտել է ՆԱՏՕ-ի գլխավոր քարտուղար Մարկ Ռյուտեի մեկնաբանությունները Թեհրանի դեմ ԱՄՆ-Իսրայել պատերազմի վերաբերյալ։

Mark Rutte’s repeated admissions of Europe’s willful complicity in the US-Israeli war of aggression against Iran only confirms, once again, that they were not impartial in this brutal unlawful aggression. Those who provided their territories, military bases, and infrastructure to…

— Esmaeil Baqaei (@IRIMFA_SPOX) July 9, 2026

«Մարկ Ռյուտեի՝ քանիցս հնչեցված խոստովանություններն այն մասին, որ Եվրոպան գիտակցաբար ներգրավված է եղել Իրանի դեմ ամերիկա-իսրայելական պատերազմում, ևս մեկ անգամ հաստատում են, որ նրանք չեզոք կողմ չեն եղել այս դաժան և անօրինական ագրեսիայի ընթացքում։ Նրանք, ովքեր իրենց տարածքները, ռազմական բազաներն ու ենթակառուցվածքները տրամադրել են ագրեսիան իրականացնելու համար, չեն կարող խուսափել չպատճառաբանված ագրեսիային իրենց մասնակցության և դրա ծանր հետևանքների համար իրենց պատասխանատվությունից»,- «Արմենպրես»-ի փոխանցմամբ, X-ի իր էջում նշել է Բաղային:

Նա ՆԱՏՕ-ի գլխավոր քարտուղարի խոսքերը համարել է շողոքորթություն։

«Վաշինգտոնի աչքերում անարդյունավետ կազմակերպությունը չի կարող արդյունավետ դառնալ շողոքորթության միջոցով, և ոչ էլ նման մանիպուլյատիվ շողոքորթությունը երբևէ կարող է վերականգնել շողոքորթողի սեփական ինքնահարգանքն ու անձնական ազնվությունը»,- նշել է Բաղային:

Ավելի վաղ Ռյուտեն իր աջակցությունն էր հայտնել ԱՄՆ-ի կողմից Իրանի վրա վերջին հարձակումներին՝ նշելով, որ դրանք «բացարձակ անհրաժեշտ էին»։