2 րոպեի ընթերցում
Եվրոպական միության արտաքին քաղաքականության ղեկավար Կայա Կալասը հայտարարել է, որ մտավախություն ունի, որ Միացյալ Նահանգների և Իրանի միջև խաղաղության բանակցությունների արդյունքում կկնքվի ավելի «թույլ» համաձայնագիր, քան տասը տարի առաջ։ «Արմենպրես»-ի փոխանցմամբ՝ Կալասի խոսքերն է մեջբերում Արտաքին գործողությունների եվրոպական ծառայությունը։
«Եթե բանակցությունները միայն միջուկային (հարցի) շուրջ լինեն, և սեղանի շուրջ միջուկային փորձագետներ չլինեն, ապա մենք կհասնենք մի համաձայնագրի, որն ավելի թույլ կլինի, քան ԳՀՀԾ-ն էր», - Կիպրոսում ԵՄ ղեկավարների ոչ պաշտոնական գագաթաժողովի երկրորդ օրվա մեկնարկից առաջ ասել է Կալասն՝ անդրադառնալով ԱՄՆ նախկին նախագահ Բարաք Օբամայի վարչակազմի օրոք՝ 2015 թվականին կնքված համաձայնագրին։
Կալասը չի բացառել «ավելի վտանգավոր Իրան» ունենալու հանգամանքը, եթե բանակցողները չհասցեագրեն Իրանի «հրթիռային ծրագրերը, նրանց աջակցությունը պրոքսի խմբերին, ինչպես նաև հիբրիդային և կիբերգործունեությունը Եվրոպայում»։
2015 թվականին Մեծ Բրիտանիան, Գերմանիան, Չինաստանը, Ռուսաստանը, ԱՄՆ-ն, Ֆրանսիան և Իրանը ստորագրեցին միջուկային համաձայնագիր՝ «Գործողությունների համատեղ համապարփակ ծրագիրը» (ԳՀՀԾ), որը ենթադրում էր պատժամիջոցների վերացում՝ Իրանի միջուկային ծրագրի սահմանափակման դիմաց:
2018 թ. մայիսին ԱՄՆ-ն նախագահ Դոնալդ Թրամփի օրոք դուրս եկավ ԳՀՀԾ-ից և վերականգնեց Թեհրանի դեմ պատժամիջոցները։