Եվրախորհրդարանում տեղի է ունեցել Հայաստան-ԵՄ խորհրդարանական գործընկերության կոմիտեի 5-րդ նիստը
2 րոպեի ընթերցում
Եվրոպական խորհրդարանում մարտի 19-ին կայացել է Հայաստան-ԵՄ խորհրդարանական գործընկերության կոմիտեի 5-րդ նիստը։
«Արմենպրես»-ի հաղորդմամբ՝ այս մասին հաղորդագրություն է տարածել Բելգիայում ՀՀ դեսպանությունը։
Նշվում է, որ նիստը համանախագահել են ԵԽ պատգամավոր, Հարավային Կովկասի հարցերով պատվիրակության նախագահ Նիլս Ուշակովսը և ՀՀ ԱԺ պատգամավոր, Եվրոպական ինտեգրման հարցերի մշտական հանձնաժողովի նախագահ Արման Եղոյանը։
Նիստի ընթացքում անդրադարձ է կատարվել ՀՀ-ԵՄ գործընկերության նոր օրակարգին, խաղաղության ամրապնդմանն ուղղված ՀՀ կառավարության ջանքերին, մուտքի վիզաների ազատականացման ուղղությամբ տարվող լայնածավալ աշխատանքին, ինչպես նաև ենթակառուցվածքային ծրագրերին։
Նշվում է, որ միջոցառմանը մասնակցել են նաև ԱԳԵԾ բարձրաստիճան պաշտոնյաները, Եվրամիություն-Հայաստան քաղաքացիական հասարակության ներկայացուցիչները, ՀՀ ներքին գործերի նախարարի տեղակալ Արմեն Ղազարյանը, ինչպես նաև ԵՄ կառույցների այլ պաշտոնյաներ։
Միջոցառմանը հեռավար ձևաչափով մասնակցել է նաև ԵՄ-ում Հայաստանի Հանրապետության դեսպան Տիգրան Բալայանը, որը ներկայացրել է ԵՔՀ և ՀՀ-ԵՄ առաջին գագաթնաժողովների նախապատրաստական աշխատանքները և հայկական կողմի ակնկալիքները, ինչպես նաև անդրադարձել է ենթակառուցվածքային նախագծերին՝ ընդգծելով Հայաստանի պատրաստակամությունը՝ խորացնելու համագործակցությունը Եվրամիության գործընկերների հետ։
Նշվում է, որ նիստի արդյունքներով ընդունվել է համատեղ հայտարարություն։