2 րոպեի ընթերցում
Չինաստանն ու Գերմանիան պետք է ամրապնդեն ռազմավարական հաղորդակցությունը, մեծացնեն փոխվստահությունը և խթանեն ռազմավարական գործընկերության զարգացումը։ Ինչպես «Արմենպրես»-ը տեղեկանում է Xinhua-ից, այս մասին Պեկինում Գերմանիայի կանցլեր Ֆրիդրիխ Մերցի հետ հանդիպման ժամանակ ասել է Չինաստանի նախագահ Սի Ծինփինը։
«Որքան աշխարհը դառնում է ավելի անհանգիստ և փոխկապակցված, այնքան ավելի շատ Չինաստանն ու Գերմանիան պետք է ամրապնդեն ռազմավարական հաղորդակցությունը, մեծացնեն ռազմավարական փոխադարձ վստահությունը և խթանեն երկու երկրների միջև համապարփակ ռազմավարական գործընկերության շարունակական նոր զարգացումը», - նշել է Սի Ծինփինը։
Նա հավելել է, որ Երկրորդ համաշխարհային պատերազմի ավարտից ի վեր միջազգային ներկայիս իրավիճակը ենթարկվում է ամենախորը փոփոխությունների։
Սի Ծինփինը Չինաստան-Գերմանիա հարաբերությունների հետագա զարգացման համար առաջ է քաշել երեք առաջարկ՝ երկու երկրները պետք է լինեն միմյանց աջակցող հուսալի գործընկերներ, լինեն բաց և փոխադարձ շահեր ունեցող նորարարական գործընկերներ, ինչպես նաև լինեն փոխըմբռնման և բարեկամության վրա կառուցված մշակութային գործընկերներ։
Նրա խոսքով՝ Չինաստանը և Գերմանիան պետք է պահպանեն և վերականգնեն ՄԱԿ-ի կենտրոնական դերը։
Սի Ծինփինը նաև հայտարարել է, որ Պեկինը և Բեռլինը պետք է գործընկերներ լինեն նորարարության ոլորտում և առաջ մղեն արհեստական բանականության տեխնոլոգիաների ոլորտում համագործակցությունը։
Գերմանիայի կանցլեր Ֆրիդրիխ Մերցը փետրվարի 25-ին երկօրյա պաշտոնական այցով ժամանել է Չինաստանի մայրաքաղաք Պեկին։ Նրան ուղեկցում են 30 ընկերությունների, այդ թվում՝ Volkswagen-ի և BMW-ի նման առաջատար ավտոարտադրողների բարձրաստիճան ղեկավարներ։ Այցի նպատակն է վերականգնել կապերը առևտրային անհավասարակշռության ընդլայնման ֆոնին։
Սի Ծինփինի հետ հանդիպումից առաջ Ֆրիդրիխ Մերցը հանդիպել է Չինաստանի վարչապետ Լի Ցյանին։