Հետևողականորեն գնալու ենք սահմանազատման միջոցով ՀՀ տարածքից ադրբեջանական զորքերի դուրսբերմանը. վարչապետ
2 րոպեի ընթերցում
Հայաստանի վարչապետ Նիկոլ Փաշինյանը վերահաստատել է իր այն միտքը, որ Ադրբեջանի կողմից ՀՀ ինքնիշխան տարածքների օկուպացիային վերջ կդրվի սահմանազատման գործընթացի միջոցով, և Երևանը հետևողականորեն գնալու է այդ ճանապարհով:
‹‹Արմենպրեսի››-ի փոխանցմամբ՝ այս մասին Նիկոլ Փաշինյանը նշել է Հանրային հեռուստաընկերությանը տված հարցազրույցում՝ անդրադառնալով Հայաստան-Ադրբեջան միջպետական սահմանի սահմանազատման, ինչպես նաև ՀՀ ինքնիշխան տարածքից ադրբեջանական զորքերի դուրսբերման վերաբերյալ հարցին:
Վարչապետը շեշտել է, որ Հայաստանի Հանրապետության տարածքից Ադրբեջանի զորքերի դուրսբերման վերաբերյալ հարցերը կլուծվեն, քանի որ երկու կողմերը միմյանց հետ ստորագրել են իրավական բարձրագույն ուժ ունեցող փաստաթուղթ:
‹‹Ուզում եմ, որ մենք մեկընդմիշտ արձանագրենք օկուպացված տարածքների հետ կապված խնդիրը. դրա վերաբերյալ արդեն ունենք իրավական բարձրագույն ուժ ունեցող փաստաթուղթ երկու երկրներում, և սահմանազատման գործընթացում այդ խնդիրները կլուծվեն: Սա շատ հստակ արձանագրում է, և մենք դա արել ենք շատ վաղուց. այդ հարցի շուրջ խաղաղության քայքայում չի լինելու: Մենք հետևողականորեն գնալու ենք սահմանազատման ճանապարհով և 1991 թվականի Ալմաթիի հռչակագրի հիման վրա ճշգրիտ արձանագրելու ենք Հայաստանի ու Ադրբեջանի ինքնիշխան տարածքները››,-նշել է վարչապետը:
ՀՀ վարչապետ Նիկոլ Փաշինյանը և այլ պաշտոնյաներ բազմիցս հայտարարել են, որ Հայաստանը խնդիր չի դնում ռազմական ճանապարհով վերականգնել ինքնիշխանությունն Ադրբեջանի կողմից 2021-2022 թվականներին օկուպացված տարածքների նկատմամբ և մտադիր է հասնել դրան սահմանազատման գործընթացի միջոցով: