2 րոպեի ընթերցում
Ադրբեջանի նախագահ Իլհամ Ալիևը հունվարի 26-ին ընդունել է Իսրայելի արտաքին գործերի նախարար Գիդեոն Սաարին։
Ինչպես հաղորդում է «Արմենպրես»-ը, այս մասին հայտնում է «Ազերթաջ»-ը:
Զրույցի ընթացքում անդրադարձ է կատարվել օրեր առաջ Դավոսում Ադրբեջանի և Իսրայելի նախագահների հանդիպմանը, որի ընթացքում քննարկվել են երկկողմ օրակարգին վերաբերող հարցեր։
Ընդգծվել է երկու երկրների միջև հարաբերությունների հաջող զարգացումը տարբեր ոլորտներում, այդ թվում՝ առևտրատնտեսական, էներգետիկ, զբոսաշրջային և այլն։
Նշվել է գյուղատնտեսության, ջրային ռեսուրսների կառավարման և բարձր տեխնոլոգիաների, այդ թվում՝ արհեստական բանականության ոլորտներում համագործակցությունը և անդրադարձ է կատարվել տարբեր մակարդակներում փոխադարձ այցելությունների և շփումների ներդրմանը համագործակցության խորացման գործում։
Նշվել է նաև միջկառավարական հանձնաժողովի դերը, և ընդգծվել, որ վերջերս տեղի է ունեցել հանձնաժողովի հերթական նիստը։
Գիդեոն Սաարը հայտնել է, որ այցի ընթացքում իրեն ուղեկցում են բիզնես համայնքի ներկայացուցիչներ՝ ընդգծելով, որ ադրբեջանա-իսրայելական բիզնես ֆորումը կնպաստի երկու երկրների միջև առևտրատնտեսական հարաբերությունների զարգացմանը։
Հանդիպման ընթացքում մտքերի փոխանակում է տեղի ունեցել փոխադարձ հետաքրքրություն ներկայացնող այլ հարցերի շուրջ։