Վարչապետը հաստատել է, որ Հայաստանը Եվրոպական խաղաղության գործիքի շրջանակներում նոր օգնություն կստանա
1 րոպեի ընթերցում
Հայաստանի Հանրապետության վարչապետ Նիկոլ Փաշինյանը հաստատել է տեղեկությունը, որ Հունգարիան հանել է իր վետոն Եվրոպական խաղաղության հիմնադրամի շրջանակներում Հայաստանին 20 միլիոն եվրո հատկացնելու որոշման վրայից։
«Արմենպրես»-ի հաղորդմամբ՝ այս մասին վարչապետ Նիկոլ Փաշինյանն ասաց կառավարության նիստից հետո լրագրողների հետ ճեպազրույցի ընթացքում։
Վարչապետը շեշտեց, որ այդ գումարը նպաստելու է խաղաղության օրակարգի առաջմղմանը և ծառայելու է դրա իրագործմանը։
«Այո, Հայաստանի արտաքին գործերի նախարարը զեկուցել է ինձ, որ Հունգարիայի գործընկերները, կարծես, որոշմանը համաձայնել են, և կա կոնսենսուս։ Դե յուրե որոշումը կլինի, կհրապարակվի։ Բովանդակային առումով այս պահին չեմ կարող ասել, բայց բոլոր դեպքերում դա նպաստելու է և ծախսվելու է խաղաղության տրամաբանությամբ»,-ընդգծեց Հայաստանի վարչապետը։