Այս տարի սուբվենցիոն ծրագրերով համայնքներում իրականացվել են շուրջ 150 մլն դոլարի ծրագրեր. Փաշինյան
2 րոպեի ընթերցում
2025 թվականին համայնքներում սուբվենցիոն ծրագրերի շրջանակում իրականացվել են շուրջ 150 միլիոն ԱՄՆ դոլարի ներդրումային ծրագրեր՝ պետական բյուջեի միջոցներով։ «Արմենպրես»-ի հաղորդմամբ՝ ՀՀ կառավարության նիստի ժամանակ այս մասին հայտարարեց վարչապետ Նիկոլ Փաշինյանը։
Կառավարության նիստում Տարածքային կառավարման և ենթակառուցվածքների նախարար Դավիթ Խուդաթյանն իր հերթին ներկայացրեց տարվա ընթացքում իրականացված այլ խոշոր ծրագրերը։ «Պետական բյուջեի միջոցներով ճանապարհաշինարարության համար հատկացվել է շուրջ 55 միլիարդ դրամ, որի պատվիրատուն եղել է «Ճանապարհային դեպարտամենտ» հիմնադրամը։ Բացի այդ, շուրջ 2 միլիարդ դրամ է ուղղվել հրատապ ծրագրերի իրականացմանը, ևս 2 միլիարդ դրամ՝ մասնակցային բյուջետավորման ծրագրերի շրջանակում»,-ասաց նա։
Ամփոփելով ներկայացված տվյալները՝ վարչապետ Նիկոլ Փաշինյանը նշել է, որ, ընդհանուր առմամբ, տարվա ընթացքում պետական միջոցներով իրականացված ներդրումների ծավալը մոտենում է 300 միլիոն ԱՄՆ դոլարին։
«Այստեղ չենք հաշվում դպրոցները, մանկապարտեզները, բժշկական կենտրոնները, հուշարձանների վերանորոգումը և այլ ծրագրերը։ Սրանք աներևակայելի թվեր են, և երբ խոսում ենք տնտեսության զարգացման մասին, հարցի պատասխանը հենց այստեղ է»,-ընդգծեց վարչապետը։