1 րոպեի ընթերցում
Գյումրի համայնքի՝ լիազորությունները ժամանակավորապես կասեցված ղեկավար Վարդան Ղուկասյանի կալանքի ժամկետը երկարաձգվեց երեք ամսով։
«Արմենպրես»-ի փոխանցմամբ՝ դեկտեմբերի 17-ին կայացած դատական նիստի ժամանակ մեղադրող դատախազը պահանջել էր երկարաձգել Վարդան Ղուկասյանի կալանքի ժամկետն այն հիմքով, որ նրան կալանավորելու համար ավելի վաղ ներկայացված հիմքերը պահպանվում են։
Վարդան Ղուկասյանի պաշտպաններն էլ հանդես էին եկել նրա կալանքը փոխելու, այլընտրանքային խափանման միջոց կիրառելու միջնորդությամբ։
Վարդան Ղուկասյանի խափանման միջոցը փոխելու երաշխավորությամբ էին հանդես եկել նաև ԱԺ «Հայաստան» խմբակցության պատգամավորներ Գեղամ Մանուկյանը, Գառնիկ Դանիելյանը և Մհեր Մելքոնյանը։
Վարդան Ղուկասյանը ձերբակալվել էր Գյումրիի քաղաքապետարանում իրականացված խուզարկություններից հետո․ հոկտեմբերի 21-ին նա երկու ամսով կալանավորվեց։ Ղուկասյանը և քաղաքապետարանի մի շարք աշխատակիցներ մեղադրվում են խմբով խոշոր չափերով կաշառք ստանալու և տալու մեղադրանքներով։ Ղուկասյանը մեղադրանքը չի ընդունում։