Կոռուպցիայի դեմ պայքարում փորձում ենք հանրային պաշտոն զբաղեցնող անձանց մտածելակերպն ու վարքագիծը փոխել․ Մարիամ Գալստյան

Կոռուպցիայի կանխարգելման հանձնաժողովի նախագահի պարտականությունները կատարող Մարիամ Գալստյանը ամփոփեց հակակոռուպցիոն ոլորտում 2025 թվականին իրականացված աշխատանքները՝ ընդգծելով, որ հանձնաժողովի հիմնական նպատակը հանրային պաշտոնատար անձանց վարքագծի և մտածելակերպի փոփոխությունն է։

«Արմենպրես»-ի հաղորդմամբ՝ լրագրողների հետ ճեպազրույցում Գալստյանը նշեց, որ կանխարգելման ոլորտում մեծ աշխատանք է կատարվել, սակայն այս ուղղության ազդեցությունը դրսևորվում է երկարաժամկետ կտրվածքով։

«Կանխարգելումն ավելի բարդ գործընթաց է, որի արդյունքներն ավելի երկարաժամկետ հատվածում են երևալու։ Մենք կարծում ենք՝ բավականին շատ ծրագրեր ենք իրականացրել և բավականին շատ ծրագրեր ունենք, որոնց արդյունքները առաջիկայում տեսանելի կլինեն»,-ասաց նա։

Գալստյանի խոսքով՝ տարբեր ոլորտներում են կանխարգելում իրականացնում։ 

«Հիմնականում վարքագծի փոփոխությանն է միտված մեր աշխատանքը։ Մենք փորձում ենք հանրային պաշտոն զբաղեցնող անձանց մտածելակերպն ու վարքագիծը փոխել»,- ընդգծեց Գալստյանը։

Նա ընդգծեց, որ կանխարգելման քաղաքականությունը ներառում է ինչպես կրթական, այնպես էլ վերահսկող մեխանիզմներ։

«Մյուս կողմից արդեն ավելի թեթև, բայց պատժողական գործիքակազմով փորձում ենք կանխարգելել կոռուպցիան՝ հայտարարագրերի վերլուծության, բարեվարքության համակարգի, անհամատեղելիության պահանջների, շահերի բախման և վարքագծի կանոնների միջոցով՝ հասկանալու, թե ինչպես են հանրային պաշտոն զբաղեցնողները շփվում հանրության հետ»,- ասաց Գալստյանը։

Գալստյանը նաև տեղեկացրեց, որ ԱԺ-ում քննարկվում է նախագիծ, որը հանձնաժողովին լրացուցիչ գործիքակազմ կտրամադրի։

«Արդարադատության նախարարության գործընկերների միջոցով ունենք նախագիծ, որով կոռուպցիոն ռիսկերի գնահատման իրավասությունը կհանձնվի հանձնաժողովին։ Այս կերպ կկարողանանք ինստիտուցիոնալ մակարդակում հասկանալ՝ որտեղ են ռիսկերը և հենց այդ մակարդակում կանխարգելել»,- եզրափակեց Գալստյանը։