Պապոյանը գերմանացի գործարարների հետ քննարկել է տնտեսական գործակցության զարգացման հնարավորությունները
2 րոպեի ընթերցում
Հայաստանի Էկոնոմիկայի նախարար Գևորգ Պապոյանը Բեռլինում հանդիպել է գերմանացի ավելի քան 40 գործարարի հետ։ «Արմենպրես»-ի փոխանցմամբ՝ այս մասին Պապոյանը հայտնել է «Ֆեյսբուք»-ի իր էջում։
Հանդիպման ընթացքում նախարարը ներկայացրել է Հայաստանի ներդրումային միջավայրի հնարավորություններն ու գործիքակազմը, առանձին անդրադարձ կատարել երկրների միջև տնտեսական համագործակցությանը՝ մասնավորապես գյուղատնտեսության, էներգետիկայի, ձեռներեցության զարգացման, տեխնոլոգիաների և հեռահաղորդակցության ոլորտներում։
«Գերմանիան արդեն իսկ Հայաստանի կարևոր տնտեսական գործընկերն է, բայց ես համոզված եմ, որ իրական ներուժը դեռ առջևում է։ Մենք նպատակ ունենք նոր թափ հաղորդել առևտրային և ներդրումային մեր երկկողմ հարաբերություններին՝ խրախուսելով ուղղակի ներդրումները Գերմանիայից և ընդլայնելով համագործակցությունը այնպիսի ոլորտներում, ինչպիսիք են ենթակառուցվածքները, վերականգնվող էներգիան, ջրային ռեսուրսների կառավարումը, գյուղատնտեսությունը, նորարարությունը և տեխնոլոգիաները»,- նշել է Պապոյանը։
Հանդիպման ընթացքում Էկոնոմիկայի նախարարը պատասխանել է մասնակիցներին հուզող հարցերին, լսել նրանց առաջարկները։
Հանդիպմանը մասնակցել են նաև Գերմանիայում ՀՀ դեսպան Վիկտոր Ենգիբարյանը, ՀՀ էկոնոմիկայի նախարարի տեղակալ Անուշիկ Ավետյանը։