1 րոպեի ընթերցում
ԱՄՆ պետքարտուղար Մարկո Ռուբիոյի և Ռուսաստանի արտաքին գործերի նախարար Սերգեյ Լավրովի միջև այս շաբաթ նախատեսված հանդիպումը հետաձգվել է։ «Արմենպրես»-ի փոխանցմամբ՝ այս մասին հաղորդում է CNN-ը՝ հղում անելով Սպիտակ տան պաշտոնյային, որի անունը չի նշվում։
Հանդիպման հետաձգման պատճառները չեն բացահայտվել։ Սակայն աղբյուրներից մեկը հեռուստաալիքին հայտնել է, որ Ռուբիոն և Լավրովը տարբեր սպասումներ ունեն ռուս-ուկրաինական հակամարտության հնարավոր ավարտի վերաբերյալ։
Նաև պարզ չէր, թե Դոնալդ Թրամփի և Վլադիմիր Պուտինի՝ Բուդապեշտում սպասվող հանդիպումից առաջ Լավրովի և Ռուբիոյի հանդիպումն ինչ ազդեցություն կունենար երկու նախագահների գագաթնաժողովի վրա։
Ռուբիոն և Լավրովը հոկտեմբերի 20-ին հեռախոսազրույցի ժամանակ քննարկել են Մոսկվայի և Վաշինգտոնի միջև Ուկրաինայում հակամարտության կարգավորման վերաբերյալ առաջիկա շփումները։
Թրամփը հոկտեմբերի 16-ին Պուտինի հետ հեռախոսազրույցից հետո հայտարարել էր, որ իրենք պայմանավորվել են, որ «հաջորդ շաբաթ կկայանա մեր բարձր մակարդակի խորհրդականների հանդիպում», որին ամերիկյան կողմից կմասնակցի Մարկո Ռուբիոն։