Էկոնոմիկայի նախարարը ներկայացրեց Հայաստանում հանքարդյունաբերության ոլորտի հիմնական մարտահրավերները
2 րոպեի ընթերցում
Հայաստանի էկոնոմիկայի նախարար Գևորգ Պապոյանը ներկայացրեց Հայաստանում հանքարդյունաբերության ոլորտում հիմնական մարտահրավերները։
«Որոշ հանքավայրեր 15-20 տարի հետո կարող են այլևս չլինել։ Հետևաբար, անհրաժեշտ է իրականացնել նոր որոնումներ, որպեսզի, եթե մեզ համար սա առաջնահերթ ոլորտ է, շարունակենք ներդրումները և այն մնա տնտեսության կարևոր ճյուղերից մեկը»,- «Արմենպրես»-ի հաղորդմամբ՝ լրագրողների հետ ճեպազրույցում ասաց Պապոյանը։
Նախարարը կարևորեց նաև ժամանակակից բնապահպանական պահանջներին համապատասխան գործունեությունը։
«Շատ կարևոր է, որ հանքարդյունաբերությունը ոչ միայն տնտեսական օգուտ բերի, այլ նաև հնարավորինս նվազագույնի հասցնի բնապահպանական վնասները»,- ընդգծեց Պապոյանը։
Պապոյանի խոսքով՝ նախարարության հատուկ ուշադրության կենտրոնում է արտադրական շղթայի երկարացումը։
«Այսօր մենք հիմնականում արդյունահանում ենք և արտահանում։ Մեր նպատակն է անցնել ավելի բարդ ու երկար շղթաների՝ ստեղծելով ավելի բարդ արտադրանք։ Օրինակ՝ պղնձի հանքաքարից անցնել պղնձի ձուլակտորի, ապա մետաղալարի և էլեկտրական սարքավորումների արտադրության։ Սա էապես կավելացնի տնտեսության բարդության ինդեքսը»,- շեշտեց Պապոյանը։
Նախարարը հավելեց, որ այս ուղղությամբ քննարկումներ են ընթանում Զանգեզուրի պղնձամոլիբդենային կոմբինատի և Ամուլսարի հանքի հետ։ «Եթե որոշենք գնալ այդ ճանապարհով, դա կլինի կարևոր ռազմավարական որոշում, որը պետք է կայացնենք հանրության հետ միասին։ Այդ որոշումը կբերի ավելի շատ հարկերի, նոր աշխատատեղերի և ավելի զարգացած տնտեսության»,-նշեց Պապոյանը։