Անվավեր է ճանաչվել Երևանի քաղաքապետի 2003 թ․ առուվաճառքի պայմանագիրը․ հողամասն ամրացվեց Պետգույքի կոմիտեին
2 րոպեի ընթերցում
Հայաստանի կառավարությունը Պետական գույքի կառավարման կոմիտեին ամրացրեց Երևանի Աջափնյակ վարչական շրջանում գտնվող 18 մլն 293 հազար 121 դրամ շուկայական արժեքին մոտարկված կադաստրային արժեքով 735 քմ հողամասը։
«Արմենպրես»-ի փոխանցմամբ՝ գործադիրի հոկտեմբերի 2-ի նիստում Տարածքային կառավարման և ենթակառուցվածքների նախարարի տեղակալ Նարինե Ղալեչյանը հայտնեց, որ հողամասը Հայաստանի Հանրապետությանն է վերադարձվել Գլխավոր դատախազության հայցի հիման վրա՝ Հակակոռուպցիոն դատարանի կողմից կայացված դատական ակտով։
«Ակտով անվավեր է ճանաչվել Երևանի քաղաքապետի և Մարինե Վարդանյանի միջև 01․02․2003 թվականին կնքված առուվաճառքի պայմանագիրը ու դրա հիման վրա Երևան քաղաքի Առաջփնյակ համայնքի Շիրազի փողոցի ձախակողմյան հատվածում գտնվող 735 քմ հողամասի սեփականության իրավունքի պետական գրանցումը»,- ասաց Ղալեչյանը։
Վճռի հիման վրա՝ 2025թ․ օգոստոսի 5-ին, նշված հասցեում գտնվող հողամասի նկատմամբ գրանցվել է Հայաստանի Հանրապետության սեփականության իրավունքը։
«Սա պետական շահերի պաշտպանության գործառույթի շրջանակներում էր, մեր հերթական հայցադիմումն է, փոխկապակցված է քրեական վարույթի հետ, որը քննվել է Հակակոռուպցիոն կոմիտեում, դատարանը մեր հայցը բավարարել էր, անվավեր էր ճանաչել առուվաճառքի պայմանագիրը։ Կիրառել էր անվավերության հետանքներ»,- նշեց Գլխավոր դատախազ Աննա Վարդապետյանը։
Գլխավոր դատախազը ներկայացրեց նաև վերջին 9 ամիսների ընթացքում պետական և համայնքային շահերի պաշտպանության լիազորությունների շրջանակում իր ղեկավարած կառույցի կատարած աշխատանքը։
«Մենք Հայաստանի Հանրապետությանն ենք վերադարձրել միայն այս լիազորության շրջանակում շուրջ 10 մլն 276 հազար ԱՄՆ դոլարին համարժեք 3 մլրդ 933 մլն դրամ շուկայականին մոտարկված կադաստրային արժեքով 280 հազար 338 քմ մակերեսով անշարժ գույք, երկու մանկապարտեզ և մեկ մարզադաշտ»,- ասաց Վարդապետյանը։
Գլխավոր դատախազությունը նույն լիազորությունների շրջանակում բռնագանձել է նաև 654 հազար ԱՄՆ դոլարին համարժեք 249 մլն դրամ։