2 րոպեի ընթերցում
Հայաստանի Հանրապետության ԳԱԱ Արևելագիտության ինստիտուտում տեղի է ունեցել հանդիպում մարզային ԲՈՒՀ-երի ներկայացուցիչների հետ։ Հանդիպման ընթացքում ինստիտուտի կողմից շուրջ 100 անուն գիրք նվիրաբերվել է Շիրակի, Գավառի, Վանաձորի և Իջևանի պետական համալսարաններին, ինչպես նաև «Կաճառ» գիտական կենտրոնին։
«Արմենպրես»-ի փոխանցմամբ՝ ՀՀ ԳԱԱ-ից հայտնում են, որ Արևելագիտության ինստիտուտի տնօրեն Գոհար Իսկանդարյանը նշել է՝ նախաձեռնության նպատակն է նպաստել մարզային համալսարանների զարգացմանը, հաստատել նոր կապեր, իրականացնել համատեղ աշխատանքներ, ծրագրեր, կազմակերպել դասախոսություններ։
«Այս աշխատանքը պետք է շարունակական լինի։ Նմանատիպ համագործակցություն ունենք Երևանի պետական համալսարանի, Ռուս-հայկական համալսարանի, ՀՀ ՊՆ Վազգեն Սարգսյանի անվան ռազմական ակադեմիայի, ՀՀ ՊՆ Պաշտպանական ազգային հետազոտական համալսարանի հետ։ Եվ մեզ համար ռազմավարական քայլ է ընդլայնել այս համագործակցությունը՝ ընդգրկելով մարզային համալսարանները», - ասել է Գոհար Իսկանդարյանը։
Քննարկվել են գիտական ոլորտում հետագա համագործակցության խորացման հեռանկարները։ Մարզային բուհերի ներկայացուցիչները շնորհակալություն են հայտնել՝ ընդգծելով ակադեմիական ինստիտուտի հետ համագործակցության անհրաժեշտությունն ու կարևորությունը։