ՀՀ ՆԳ փոխնախարարը ՉԺՀ Հասարակական անվտանգության նախարարի տեղակալի հետ հանդիպմանն անդրադարձել է մի շարք հարցերի
2 րոպեի ընթերցում
Հայաստանի ներքին գործերի նախարարի տեղակալ Արմեն Մկրտչյանը Չինաստանի Ժողովրդական Հանրապետություն կատարած այցի շրջանակում հանդիպել է ՉԺՀ Հասարակական անվտանգության նախարարի տեղակալ Չեն Սիյուանի հետ։
«Արմենպրես»-ի փոխանցմամբ՝ ՀՀ ՆԳ նախարարությունից հայտնում են, որ հանդիպման ընթացքում Չեն Սիյուանը բարձր է գնահատել դեռևս 2015 թվականին Պեկինում ստորագրված Համաձայնագրի հիման վրա ձևավորված համագործակցությունը և այն ընդլայնելու պատրաստակամություն հայտնել։
Արմեն Մկրտչյանը կարևորել է երկու երկրների իրավապահ մարմինների արդյունավետ համագործակցությունը՝ առաջարկելով այն բարձրացնել նոր մակարդակի՝ կողմերի միջև ստորագրելով փոխգործակցության նոր պայմանագիր, ինչին չինական կողմը դրական է արձագանքել։
ՆԳ նախարարի տեղակալը նաև ընդգծել է Հայաստանի Հանրապետությունում Չինաստանի Ժողովրդական Հանրապետության դեսպանությունում հասարակական անվտանգության նախարարության ներկայացուցչի, ինչպես նաև Հայաստանի Հանրապետությունում Ինտերպոլի Ազգային կենտրոնական բյուրոյի միջոցով իրականացվող համագործակցության կարևորությունը, որը հնարավորություն է տալիս ապահովել օպերատիվ տեղեկատվության փոխանակում ու երկու երկրների իրավապահ համակարգերի միջև համադրված գործողություններ։
Կողմերն անդրադարձել են նաև իրավապահ մարմինների համատեղ գործունեության արդյունավետության բարձրացմանն ուղղված հարցերին, մասնավորապես՝ անդրազգային հանցավորության, այդ թվում՝ համացանցում կատարվող հանցագործությունների, կիբեռհանցավորության, թմրամիջոցների ապօրինի շրջանառության, տնտեսական հանցագործությունների, թրաֆիքինգի և այլ հանցատեսակների դեմ պայքարի ոլորտներում։