Լավրովը և Գուտերեշը քննարկել են ՄԱԿ-ի բարեփոխումների և միջազգային հակամարտությունների վերաբերյալ հարցեր
2 րոպեի ընթերցում
Նյու Յորքում ՄԱԿ-ի Գլխավոր ասամբլեայի 80-րդ նստաշրջանի շրջանակներում Ռուսաստանի արտաքին գործերի նախարար Սերգեյ Լավրովը հանդիպել է ՄԱԿ-ի գլխավոր քարտուղար Անտոնիու Գուտերեշի հետ։
«Արմենպրես»-ի փոխանցմամբ՝ այս մասին հայտնում է Ռուսաստանի արտաքին գործերի նախարարությունը։
Կողմերը քննարկել են ՄԱԿ-ի բարեփոխման արդիական հարցերը գլխավոր քարտուղարի «ՄԱԿ-80» նախաձեռնության համատեքստում։ Լավրովն ընդգծել է կշռադատված բարեփոխումների անհրաժեշտությունը։
Հանդիպման ընթացքում անդրադարձ է կատարվել հրատապ միջազգային հարցերի, այդ թվում՝ Ուկրաինայի և իսրայելա-պաղեստինյան հակամարտության գոտու իրավիճակի վերաբերյալ առարկայական քննարկմանը։ Նախարարն ընդգծել է ՄԱԿ-ի քարտուղարության ղեկավարության և բոլոր աշխատակիցների կողմից անաչառ և արդար գործելու կարևորությունը՝ համաձայն ՄԱԿ-ի կանոնադրության 100-րդ հոդվածի։
Ռուսաստանը և ՄԱԿ-ն արտահայտել են համագործակցությունն ամրապնդելու իրենց վճռականությունը։
«Ռուսական կողմը շեշտել է իր հավատարմությունը համաշխարհային գործերում համաշխարհային կազմակերպության կենտրոնական համակարգող դերին և ՄԱԿ-ի կանոնադրության սկզբունքներին՝ իրենց ամբողջականությամբ և անբաժանելի փոխկապակցվածությամբ», - նշվել է Ռուսաստանի արտաքին գործերի նախարարության հաղորդագրության մեջ։