Հայաստան-Չինաստան հարաբերություններում ձևավորվել է շատ կոնկրետ գործընկերություն. Նիկոլ Փաշինյան
2 րոպեի ընթերցում
Հայաստանի վարչապետ Նիկոլ Փաշինյանը լրագրողների հետ ճեպազրույցում ներկայացրեց Չինաստան կատարած աշխատանքային այցի արդյունքները։ «Արմենպրես»-ի հաղորդմամբ՝վարչապետը նշեց, որ այցի ամենակարևոր արդյունքն այն է, որ Հայաստանը և Չինաստանը ստորագրել են ռազմավարական գործընկերության հաստատման մասին փաստաթուղթ․
«Ամենակարևոր արձանագրումը, որի մասին ես կարող եմ խոսել, Հայաստանի և Չինաստանի միջև ռազմավարական գործընկերության հաստատումն է։ Սա նշանակում է, որ մեր գործարար հատվածն ունի քաղաքական դրական ազդակ՝ համագործակցությունը խորացնելու համար տնտեսության և մյուս ոլորտներում, և պարզապես պետք է մեր գործընկերները այդ հնարավորություններից օգտվեն»,- նշեց Փաշինյանը։
Նրա խոսքով՝ չնայած հեռավորությունից բխող տրանսպորտային սահմանափակումներին, տարածաշրջանային ենթակառուցվածքների ապաշրջափակումը կարող է այդ խնդիրներից շատերը լուծել։
«Հնարավորություն է ստեղծվում, որ Հայաստանում բեռնաթափված բեռները գնացքով հասցվեն Չինաստան։ Սա բոլորովին նոր տնտեսական իրավիճակ է, և մեր խնդիրներից մեկն այդ իրավիճակը արձանագրելն է»,-ընդգծեց վարչապետը։
Փաշինյանը հավելեց, որ Հայաստանի և Չինաստանի միջև ձևավորվել է շատ կոնկրետ գործընկերություն, որը ներառում է նաև փոխադարձ ներդրումային հնարավորությունների զարգացում։