Իրանի ազգային անվտանգության գերագույն խորհրդի քարտուղարը ողջունել է Հայաստանի և Ադրբեջանի միջև համաձայնությունները
2 րոպեի ընթերցում
Հայաստանի անվտանգության խորհրդի քարտուղար Արմեն Գրիգորյանը մանրամասներ է հայտնել Թեհրանում ԻԻՀ ազգային անվտանգության գերագույն խորհրդի քարտուղար Ալի Լարիջանիի հետ հանդիպումից:
«Արմենպրես»-ի փոխանցմամբ՝ Գրիգորյանն այս մասին գրառում է կատարել «Ֆեյսբուք»–ի իր էջում:
Կողմերը գոհունակությամբ նշել են ԱԽ գրասենյակների միջև ձևավորված ինստիտուցիոնալ կապերը և վստահություն հայտնել դրանց շարունակական ամրապնդման ու զարգացման հարցում:
«Հանդիպմանը քննարկել ենք տարածաշրջանային վերջին զարգացումները, ինչի համատեքստում ներկայացրել եմ օգոստոսի 8-ին ստորագրված համաձայնագրերը և նշել, որ տարածաշրջանի տնտեսական ենթակառուցվածքների ապաշրջափակման գործընթացը տեղի է ունենալու բացառապես երկրների տարածքային ամբողջականության, ինքնիշխանության, իրավազորության, սահմանների անքակտելիության և փոխադարձության սկզբունքների լիակատար հարգման շրջանակներում:
Ա.Լարիջանին ողջունել է Հայաստանի և Ադրբեջանի միջև խաղաղության հաստատմանն ուղղված համաձայնությունները՝ կարևորելով կայունության և անվտանգության ապահովումը Հարավային Կովկասում»,–տեղեկացրել է Գրիգորյանը:
Գրիգորյանն ու Լարիջանին անդրադարձ են կատարել Հայաստանի և Իրանի միջև երկկողմ օրակարգին՝ ընդգծելով տնտեսական փոխգործակցության ամրապնդման անհրաժեշտությունը: