Զելենսկին հայտնել է՝ առաջին լավ հեռախոսազրույցն է ունեցել Լեհաստանի նախագահի պաշտոնում ընտրված Կարոլ Նավրոցկիի հետ
1 րոպեի ընթերցում
Ուկրաինայի նախագահ Վլադիմիր Զելենսկին հայտարարել է, որ իր առաջին լավ հեռախոսազրույցն է ունեցել Լեհաստանի նախագահի պաշտոնում ընտրված Կարոլ Նավրոցկիի հետ, որը պաշտոնը կստանձնի հաջորդ շաբաթ: «Արմենպրես»-ի փոխանցմամբ՝ Զելենսկին այս մասին տեղեկացրել է «Տելեգրամ»–ի իր ալիքում:
Զելենսկին շնորհավորել է Լեհաստանի իր գործընկերոջը՝ հունիսի 1–ին կայացած ընտրություններում տարած հաղթանակի կապակցությամբ:
«Մենք ակնկալում ենք, որ Լեհաստանը կշարունակի մնալ մեր հուսալի գործընկերն ու դաշնակիցը: Մենք գնահատում ենք լայնածավալ պատերազմի սկզբից ի վեր Լեհաստանի ցուցաբերած ռազմական, քաղաքական և մարդասիրական աջակցությունը», - գրել է Զելենսկին՝ ընդգծելով Լեհաստանի կողմից շարունակական աջակցության կարևորությունը:
Զելենսկին և Նավրոցկին պայմանավորվել են փոխայցեր կատարել՝ քննարկելու համար երկկողմ համագործակցությանն առնչվող հարցեր: