Պետգույքի կոմիտեն նախաձեռնում է հանրային քննարկում՝ պետական մասնակցությամբ ընկերությունների բաժնետոմսերի հավատարմագրային կառավարման վերաբերյալ
1 րոպեի ընթերցում
Հայաստանի պետական գույքի կառավարման կոմիտեն նախաձեռնում է հանրային քննարկում՝ 50 և ավելի տոկոս պետական մասնակցությամբ առևտրային կազմակերպությունների բաժնետոմսերի հավատարմագրային կառավարման արդյունավետ իրականացման նպատակով:
«Արմենպրես»-ի փոխանցմամբ՝ Պետգույքի կառավարման կոմիտեից հայտնում են, որ քննարկման շրջանակում նախատեսվում է հավաքագրել գործուն առաջարկություններ, վերհանել առկա խնդիրները և հնարավոր ռիսկերը, իրականացնել լրացուցիչ ուսումնասիրություններ, ինչպես նաև անդրադառնալ «Ստեփանավանի բժշկական կենտրոն» ՓԲԸ-ի հավատարմագրային կառավարման մրցույթի նախաորակավորման փուլին։
Հանրային քննարկմանն առնչվող հարցերով և մասնակցության հայտ ներկայացնելու նպատակով բոլոր շահագրգիռ կազմակերպություններն ու անձինք կարող են դիմել Պետական գույքի կառավարման կոմիտե՝ գրելով info@spm.am էլ. հասցեին կամ զանգահարելով 011 52 65 57 հեռախոսահամարով։
«Կոմիտեն բարձր է գնահատում մասնագիտական և շահագրգիռ կողմերի ներգրավվածությունը՝ հանրային մասնակցությունը համարելով պետական գույքի կառավարման գործընթացի բարելավման կարևոր պայման»,- հայտնում են Պետգույքի կառավարման կոմիտեից: