Եվրոպական խորհրդարանում հիշատակել են Սրեբրենիցայի ջարդերի 30-րդ տարելիցը

Եվրոպական խորհրդարանը Ստրասբուրգում իր լիագումար նիստը մեկնարկել է Սրեբրենիցայի ջարդերի զոհերին հարգանքի տուրք մատուցելով։  

Նիստի բացումից հետո Եվրոպական խորհրդարանի նախագահ Ռոբերտա Մեցոլան հիշեցրել է, որ հուլիսի 7-ին լրանում է Սրեբրենիցայի ջարդերի 30-րդ տարելիցը և պատգամավորներին առաջարկել է հարգել 1995 թվականի Սրեբրենիցայի ջարդերի զոհերի հիշատակը, որի ժամանակ հազարավոր բոսնիացի մուսուլմաններ սպանվեցին կամ անհետ կորան, իսկ տասնյակ հազարավորները հարկադրաբար տեղահանվեցին այդ գոտուց։ 

Բրյուսելում «Արմենպրես»-ի թղթակցի փոխանցմամբ՝ ԵԽ պատգամավորները հարգանքի տուրք մատուցեցին ջարդերի երկու վերապրածների՝ Լամասա և Ալմիր Սալիհովիչներին, որոնք ներկա էին նիստերի դահլիճում։ 

«Այս ժողովը հարգում է ձեզ և բոլոր վերապրածներին, ինչպես նաև շարունակում է կենդանի պահել զոհերի հիշատակը»,-իր ելույթում ասաց Ռոբերտա Մեցոլան։ 

ԵԺԿ խմբակցության անունից հանդես եկող Օնդրեյ Կոլարն իր ելույթում նշել է, որ 30 տարի անցկացրել են այն համոզմունքով, որ նման բան երբեք չպետք է կրկնվի, բայց աշխարհում շարունակում ենք ականատես լինել նոր վայրագությունների։ 

«Սրեբրենիցայում կորսված անմեղ կյանքերը պետք է ամեն օր հիշեցնեն մեզ, որ ատելությունն ու ներման բացակայությունը հող են ստեղծում նոր հակամարտությունների, նոր ցավի ու նոր վշտի համար։ Դրանք պետք է հիշեցնեն մեզ, որ արդեն տեղի ունեցածը պարզապես դատապարտելը բավական չէ. պետք է գտնենք քաջություն ՝ կանխելու նման ողբերգությունները»,-ասել է Կոլարը։ 

Սոցիալ-դեմոկրատական խմբակցության անունից հանդես եկող պատգամավոր Մատյազ Նեմեցն իր խոսքում նշել է, որ Սրեբրենիցայի ջարդերի 30-րդ տարելիցի կապակցությամբ պետք է ևս մեկ անգամ վերհիշել, որ այն սկսվեց մի հռետորաբանությամբ, որը վտանգավոր կերպով նման էր այն հռետորաբանությանը, որն ազգայնականները նույնիսկ այսօր կիրառում են փոքրամասնությունների դեմ։