Վարչապետը կարևորում է ազդեցության գործակալների գործունեության նկատմամբ հստակ վերաբերմունքի ձևավորումը
1 րոպեի ընթերցում
Հայաստանի ինքնիշխանությանն ու անվտանգությանը սպառնացող վտանգների համատեքստում անհրաժեշտ է հատուկ ուշադրություն դարձնել օտարերկրյա ազդեցության գործակալների գործունեությանը։ «Արմենպրես»-ի հաղորդմամբ՝ Ազգային անվտանգության ծառայության ներկայացուցիչների հետ հանդիպման ընթացքում այս մասին հայտարարել է վարչապետ Նիկոլ Փաշինյանը
«Վերջին տարիներին մենք սկսել ենք աշխատել և ավելի լուրջ պետք է աշխատենք թարմացված ինստիտուտի՝ ազդեցության գործակալի ինստիտուտի վրա։ Չնայած այն հանգամանքին, որ քրեական օրենսգրքով ձևակերպված հատկանիշները գուցե չեն արտահայտվում, պետք է այս գործունեության ձևի նկատմամբ կոնկրետ վերաբերմունք արտահայտելու հնարավորություն ունենանք»,– նշել է նա։
Վարչապետի խոսքով՝ ազդեցության գործակալների համակարգը հիբրիդային սպառնալիքների համատեքստում թիրախավորում է պետությունը, ինքնիշխանությունը, ինքնությունը։
«Դա նշանակում է՝ Հայաստանի Հանրապետության քաղաքացիների սեփական ճակատագիրը որոշելու իրավունքի, իրավասության և ազատության համակարգի նկատմամբ կասկածի տեղիք տալ և քայքայիչ գործողություններ իրականացնել»,– ասել է Փաշինյանը։