Վարչապետը չի բացառում, որ ՌԴ-ում կան որոշակի շրջանակներ, որոնք Հայաստանում հիբրիդային գործողությունների հետևում են կանգնած

Հայաստանի վարչապետ Նիկոլ Փաշինյանը չի բացառում, որ Ռուսաստանում կան որոշակի շրջանակներ, որոնք Հայաստանի ներսում հիբրիդային գործողությունների ու պատերազմի հետևում են կանգնած։ 

«Արմենպրես»-ի հաղորդմամբ՝ այս մասին վարչապետն ասել է Ազգային ժողովում լրագրողների հետ ճեպազրույցի ընթացքում՝ խոսելով այն մասին, որ իշխանական թևի որոշ ներկայացուցիչներ Սամվել Կարապետյանի՝ նախօրեին արված հայտարարությունը գնահատում են որպես ՌԴ-ից Հայաստանի իշխանության դեմ տարվող հիբրիդային պատերազմ։  

Վարչապետը նշել է, որ ինքը փոխադարձ վստահության վրա հիմնված շատ սերտ աշխատանքային հարաբերություններ ունի Ռուսաստանի Դաշնության նախագահի և կառավարության ղեկավարի հետ։ 

«Ես չեմ կարող հավատալ, որ Կրեմլից կամ ՌԴ կառավարությունից  կարող է Հայաստանի դեմ նման գործողություն տեղի ունենալ,  բայց չեմ բացառում և մեծ է հավանականությունը, որ Ռուսաստանում, այնուամենայնիվ, կան որոշակի շրջանակներ, որոնք այս հիբրիդային գործողությունների և պատերազմի հետևում են կանգնած։ Ընդ որում, ոչ միայն Ռուսաստանում կան այդպիսի շրջանակներ։ Ես վստահ եմ, որ կոնկրետ այս դեպքում այլ երկրներում էլ կան շրջանակներ»,- հայտարարել է Նիկոլ Փաշինյանը։ 

Նա, միաժամանակ, համոզմունք է հայտնել, որ Հայաստանն ունի բոլոր կարողություններն ու հնարավորությունները՝ կառավարելու այդ հիբրիդային ռիսկերը և ոչ միայն դրանք։