Կառավարության նիստում մանրամասներ են ներկայացվել Հայաստանում ԱԲ տվյալային խոշոր կենտրոնի կառուցման ծրագրից

Հայաստանը պատրաստ է ապահովել մինչև 100 մեգավատտ հզորությամբ էլեկտրաէներգիայի մատակարարում՝ Firebird և NVIDIA ընկերությունների համատեղ նախաձեռնությամբ նախատեսվող արհեստական բանականության խոշոր տվյալային կենտրոնի համար, որի ներդրումների չափը գնահատվում է առնվազն 500 միլիոն ԱՄՆ դոլար։ 

«Արմենպրես»-ի փոխանցմամբ՝ կառավարության հունիսի 12-ի նիստում այս մասին հայտարարեց վարչապետ Նիկոլ Փաշինյանը։

«Վստահ ենք, որ համապատասխան ծավալի էլեկտրաէներգիա մատակարարելու հնարավորություններ ունենք։ Ի սկզբանե այդ հաշվարկները դրված են եղել այս նախագծի հիմքում»,- ասաց Փաշինյանը։

Բարձր տեխնոլոգիական արդյունաբերության նախարար Մխիթար Հայրապետյանը մանրամասն ներկայացրեց ծրագրի տեխնոլոգիական բնույթը՝ նշելով, որ այն իրականացվում է սփյուռքահայ գործարարների՝ Ռազմիկ Հովակիմյանի, Նուբար Աֆեյանի և NVIDIA փոխնախագահ Ռև Լիպարիտյանի ակտիվ մասնակցությամբ։ 

«Խոսքը նոր սերնդի գրաֆիկական պրոցեսորների մասին է, որ Firebird-ը պետք է ձեռք բերի NVIDIA ընկերությունից, որն այս պահի դրությամբ աշխարհի ամենաառաջատար տեխնոլոգիան է համարվում։ Պրոցեսորները, որոնք համալրված են ամենաառաջատար չիպերով։ Սա հնարավորություն է տալու արհեստական բանականության հաշվողական ռեսուրսների cloud ծառայություններ մատուցել և՛ Հայաստանյան տնտեսությանը, և՛ աշխարհի տարատեսակ ընկերությունների տեխնոլոգիական ընկերությունների, որոնք հիմնականում նորարարություններով են զբաղվում»,– նշեց Հայրապետյանը։

Նախարարի խոսքով՝ արդեն մի քանի խոշոր ընկերություններ հայտնել են հետաքրքրվածություն՝ օգտվելու տվյալ կենտրոնի cloud ծառայություններից, ինչը ամրապնդում է նախագծի իրատեսականությունը։ 

«Այս պահին չունենք վերջնական որոշում մեր ներգրավվածության ձևաչափի մասին, սակայն ծրագրի իրագործումը՝ որպես փաստ, արդեն հաստատվել է թե՛ Firebird-ի, թե՛ NVIDIA-ի կողմից»,- ասաց Հայրապետյանը։

Վարչապետ Փաշինյանն իր հերթին ընդգծեց նաև ներդրումային նախագծի հնարավոր տեղակայումը Ակադեմիական քաղաքի տարածքում՝ նշելով, որ դա կստեղծի կրթական և տեխնոլոգիական սիներգիա։

«Առաջարկել եմ, որ մեր գործընկերները քննարկեն նաև այս ներդրումային ծրագիրը իրականացնել Ակադեմիական քաղաքի տարածքում, որտեղ մենք բավականին մեծ տարածքներ և հնարավորություններ ունենք, և նաև ակնհայտ է, որ այս ենթակառուցվածքը մեծ թվով համապատասխան որակավորում ունեցող մասնագետների կարիք է ունենալու», -ասաց վարչապետը։