Իրանը հակամարտության դեպքում կհարվածի Մերձավոր Արևելքում ԱՄՆ-ի բոլոր ռազմակայաններին. Նասիրզադե
1 րոպեի ընթերցում
ԱՄՆ-ի հետ զինված բախում սկսվելու դեպքում Իրանը կհարձակվի Մերձավոր Արևելքում բոլոր ամերիկյան ռազմակայանների վրա: Ինչպես «Արմենպրես»-ը տեղեկանում է ՏԱՍՍ գործակալությունից, այդ մասին հայտարարել է իսլամական հանրապետության պաշտպանության նախարար գեներալ-մայոր Ազիզ Նասիրզադեն:
«(Ամերիկյան) կողմի որոշ ներկայացուցիչներ սպառնում են, որ եթե բանակցություններն արդյունքի չհանգեցնեն, գործը կհասնի բախման: Հուսով եմ, որ բանակցությունները կավարտվեն հաջող, բայց եթե մեզ զինված բախում պարտադրվի, հակառակորդի կորուստները միանշանակ կլինեն ավելի մեծ, և այդ դեպքում ԱՄՆ-ն ստիպված կլինի լքել տարածաշրջանը: Բոլոր ամերիկյան ռազմակայանները գտնվում են մեր հասանելիության գոտում, և մենք առանց տատանվելու հարվածներ կհասցնենք դրանց այն երկրների տարածքում, որտեղ դրանք տեղակայված են», - ասել է նա Իրանի պետական հեռուստառադիոընկերության եթերում:
Իրանի և ԱՄՆ-ի միջև Թեհրանի միջուկային ծրագրի շուրջ բանակցությունների վեցերորդ փուլը տեղի կունենա հունիսի 15-ին՝ Օմանի մայրաքաղաքում։