2 րոպեի ընթերցում
ԱՄՆ նախագահ Դոնալդ Թրամփը հունիսի 9-ին կայացած հեռախոսազրույցի ժամանակ Իսրայելի վարչապետ Բենիամին Նեթանյահուին ասել է, որ դեմ է Իրանի նկատմամբ ռազմական գործողություններին, քանի որ ակնկալում է Թեհրանի հետ համաձայնության գալ միջուկային ծրագրի շուրջ: «Արմենպրես»-ի փոխանցմամբ՝ այս մասին հաղորդում է Axios լրատվական հարթակը՝ վկայակոչելով իսրայելցի և ամերիկացի պաշտոնյաների:
Ըստ աղբյուրների՝ Թրամփը Նեթանյահուի հետ զրույցում վստահություն է հայտնել, որ Իրանի հետ համաձայնության հասնելու հնարավորություն կա: Նախագահը նշել է, որ այդ պատճառով էլ այս պահին դեմ է հանդես գալիս ռազմական գործողություններին:
Լրատվական հարթակի տվյալներով՝ Նեթանյահուն Թրամփին ասել է, որ «իրանցիները բանակցությունները ձգձգելու վարպետներ են», և հետևաբար, Թեհրանը պետք է իրական ռազմական սպառնալիք տեսնի:
«Կարծես թե, Թրամփին այդ փաստարկները չեն համոզել», - նշել է իսրայելցի պաշտոնյան:
Ըստ հրապարակման՝ ԱՄՆ նախագահն ընդգծել է, որ իրանցիները «համառ» են, սակայն ինքը կարծում է, որ նրանց կարելի է համոզել համաձայնագիր կնքել։ Թրամփը նշել է, որ ցանկանում է սպասել բանակցությունների հաջորդ փուլի արդյունքներին:
Ինչպես ավելի վաղ հայտնել էր Axios-ը՝ վկայակոչելով աղբյուրների, Նեթանյահուն ավելի շատ հետաքրքրված է Իրանի միջուկային ծրագրի շուրջ ճգնաժամի լուծման «ռազմական տարբերակի իրականացմամբ»: Հարթակի տվյալներով՝ Իսրայելի վարչապետը վստահեցրել է ԱՄՆ նախագահին, որ ոչ մի ռազմական բնույթի գործողություն չի ձեռնարկի Իրանի դեմ, քանի դեռ Թեհրանն ու Վաշինգտոնը բանակցություններ են վարում միջուկային ծրագրի շուրջ:
ԱՄՆ-Իրան բանակցությունների հաջորդ՝ վեցերորդ փուլը նախատեսված է հունիսի 15-ին, Օմանի մայրաքաղաքում։ Ամերիկյան պատվիրակությունը գլխավորում է Սպիտակ տան հատուկ բանագնաց Սթիվ Ուիթքոֆը, իսկ իրանական պատվիրակությունը՝ արտգործնախարար Աբբաս Արաղչին։