2 րոպեի ընթերցում
Ռուսաստանի Դաշնության նախագահ Վլադիմիր Պուտինը շնորհավորել է Հայաստանի, Բելառուսի, Ղազախստանի և Ղրղզստանի ղեկավարներին՝ Եվրասիական տնտեսական միության օրվա կապակցությամբ։
«Արմենպրես»-ի փոխանցմամբ՝ այս մասին նշված է Կրեմլի պաշտոնական կայքում տարածված հաղորդագրության մեջ։
ՌԴ նախագահը նշել է, որ ԵԱՏՄ շրջանակներում ինտեգրացիոն գործընթացները զարգանում են շատ դինամիկ և արդյունավետ։ Նրա բնորոշմամբ՝ ստեղծվել է ընդհանուր շուկա, որն ապահովում է ապրանքների, ծառայությունների, կապիտալի և աշխատուժի տեղաշարժի ազատությունը։
«Իրականացվում է իրավական կարգավորման ազգային համակարգերի ներդաշնակեցումը կարևորագույն ոլորտներում, հաջողությամբ իրականացվում են համատեղ տնտեսական և ենթակառուցվածքային նախագծեր», - ասված է ՌԴ նախագահի ուղեձում։
Վլադիմիր Պուտինը վստահություն է հայտնել, որ ԵԱՏՄ անդամ երկրները կշարունակեն կառուցել կառուցողական բազմակողմ համագործակցությունը բոլոր հնարավոր ձևերով՝ իրենց ժողովուրդների բարօրության, եվրասիական տարածքում բարեկեցության և կայունության ապահովման շահերից ելնելով։
«Մաղթում եմ ձեզ առողջություն և հաջողություններ, իսկ ձեր բոլոր հայրենակիցներին՝ երջանկություն և բարգավաճում», - եզրափակել է Ռուսաստանի նախագահը։
Եվրասիական տնտեսական միությունը (ԵԱՏՄ) միջազգային ինտեգրացիոն տնտեսական միավորում է, որի մասնակիցներն են Ռուսաստանը, Հայաստանը, Բելառուսը, Ղազախստանը և Ղրղզստանը։ ԵԱՏՄ-ի մասին պայմանագիրը ստորագրվել է 2014 թվականի մայիսի 29-ին Աստանայում՝ պետությունների ղեկավարների կողմից։ Փաստաթղթի համաձայն՝ ասոցիացիայի նպատակներն են մասնակից երկրների տնտեսական զարգացումը, արդիականացումը և համաշխարհային շուկայում մրցունակության բարձրացումը։